რეგიონები

ბათუმში, ბულვარში 16-სართულიანი სასტუმროს მშენებლობას აპროტესტებენ

"ბეტონყმობა", "ნუ გვაბრუნებთ გამოქვაბულში", "ხელები შორს ჩვენი ქალაქისგან",- ამ ლოზუნგებით ბათუმის ბულვარში, ადგილობრივებმა ქალაქის მთავარ რეკრეაციულ ზონაში 16-სართულიანი სასტუმრო "ამბასადორის" მშენებლობა გააპროტესტეს.

მათ მიაჩნიათ, რომ კულტურული მემკვდირეობის ზონაში მსგავსი შენობა-ნაგებობის მშენებლობა არ უნდა ხორციელდებოდეს. ამასთან, ბათუმელები ამტკიცებენ, რომ ნებართვა უკანონოდაა გაცემული და მასში კორუფციულ გარიგებას ხედავენ.

"კულტურული მემკვიდრეობის სააგენტომ შუა ბულვარში უსახური ნაგებობის აშენების ნება გასცა, რაც არღვევს ლანდშაფტს. ჩვენ ვიცით, რომ თორნიკე რიჟვაძემ რამდენიმე მილიონის სანაცვლოდ გადათქვა დაპირება, რომელიც შარშან გასცა, რომ 4 სართულზე მაღალი შენობა არ აშენდებოდა", - ამბობს ალექსადნრე მილორავა.

"2020 წლის 4 იანვარს გვონდა აქცია და მოვითხოვეთ პირობა აჭარის მთავრობის თავმჯდომარისგან, რომ აქ არ აშენდებოდა მაღალსართულიანი შენობა. დადო ეს პირობა, მაგრამ 1 წლის თავზე შენდება 16-სართულიანი სასტუმრო", - ამბობს ბაჩუკი ჩხეიძე.

ბულვარში პროექტს კომპანია შპს “ამბასადორ ბათუმი” ახორციელებს, პროექტის თანახმად, შენობაში ბალნეოლოგიურ-გამაჯანსაღებელი ცენტრისა და სასტუმროს განთავსება იგეგმება. პროექტის განსახორციელებლად ნებართვა კულტურული მემკვიდრეობის სააგენტოს ძეგლების საბჭომ გასცა.