სამართალი
ბათუმში წვრილმანი ხულიგნობისა და პოლიციის მოთხოვნისადმი დამოუმორჩილებლობის ბრალდებით შვიდი პირი დააკავეს
ბათუმში, გვიან ღამით წვრილმანი ხულიგნობისა და პოლიციელის კანონიერი მოთხოვნისადმი დაუმორჩილებლობის ბრალდებით, შვიდი პირი დააკავეს. თუმცა, თავად დაზარალებულები სამართალდამცველებს ცემაში სდებენ ბრალს.
ერთ-ერთი თვითმხილველის ვახტანგ ლომინაძის განცხადებით დაკავებისას პოლიციამ ბიჭებს ხელით შეეხო, ზოგიერთი კი, განყოფილებაში გადაყვანის დროს იქნა ნაცემი.„ჩემთვის ამოუცნობი ნივთი მომხვდა, შემდეგ, ბიჭების მიმართ იყო ხელის შეხება, ზოგი გარეთ გალახეს, ზოგი განყოფილებაში რომ გადაჰყავდათ მანქანაში. ყველა სხვადასხვა ადგილას გალახეს. წინააღმდეგობა არავის არ გაუწევია. ბიჭებს შორის მოხდა ელემენტარული შელაპარაკება, რის შედეგად ყველა ვაპირებდით სიტუაციის განეიტრალებას, ამის შედეგად მვიდნენ აგრესიით, შემდეგ ეს ყველაფერი მოხდა“,-აღნიშნა ვახტანგ ლომინაძემ.
იგვეზე საუბრობს ერთ-ერთი დაზარალებულის მამა ნიკა კეპუნიძე.
„განყოფილებაში რომ შევედი, რაზე არიან დაკავებულები მეთქი. წვრილმანი ხულიგნობისთვისო. მე ვუთხრაი თუ წვრილმანი ხულიგნობისთვის არიან დაკავებული, როგორც წესი და რიგი და კანონი ითვალისწინებს ისე მოიქეცით მეთქი. მე ვიცოდი, რომ გალახულები იყვნენ, ამიტომ ვუთხარი ეს. ხელი არ დააკაროთ და არ გალახოთ მეთქი“,-აღნიშნა ნიკა კეპუნიძემ.
შინაგან საქმეთა სამინისტროს ინფორმაციით კი, აღნიშნული პირები ერთ-ერთი რესტორნის მიმდებარე ტერიტორიაზე ერთმანეთს ფიზიკურად დაუპირისპირდნენ, რის გამოც შემთხვევის ადგილზე გამოცხადდა პოლიცია.
უწყების განმარტებით, აღნიშნულმა პირებმა ადგილზე მისულ სამართალდამცავებს წინააღმდეგობა გაუწიეს და დაკავებულ იქნენ ადმინისტრაციულ სამართალდარღვევათა კოდექსის 166-ე და 173-ე მუხლებით, რაც წვრილმან ხულიგნობას და სამართალდამცავ ორგანოს თანამშრომლის მიერ კანონიერი მოთხოვნისადმი დაუმორჩილებას გულისხმობს.
მონიკა დავლიანიძე