საზოგადოება

„ბავშვთა სამყაროს“ დაზარალებული მოვაჭრეები ხვალ ფართომასშტაბიანი აქციის ჩატარებას აპირებენ

სავაჭრო ცენტრ „ბავშვთა სამყაროს“ მოვაჭრეები ხვალ აქციას გამართავენ. ამის შესახებ მოვაჭრეთა უფლებადამცველმა ფრიდონ სუხიაშვილმა განაცხადა. მისივე თქმით, ხვალ გახდება ცნობილი მოვაჭრეთა სამომავლო გეგმა.

„ხვალ 2 საათზე არის ფართომასშტაბიანი აქცია. საზოგადოება გვიერთდება, ასევე გვიერთდება ახალგაზრდობა სოლიდარობის მიზნით, ამ ადამიანების გვედრით დგომის მიზნით. ხვალ გაჟღერდება შემდგომი გეგმა. ორშაბათს ისევ დაიდგმება აქ [მთავრობის ადმინისტრაციასთან] კარავი“, - განაცხადა სუხიაშვილმა.

სავაჭრო ცენტრ „ბავშვთა სამყაროში“ გაჩენილი ხანძრის შედეგად დაზარალებული მოვაჭრეები დღესაც შეიკრიბნენ მთავრობის კანცელარიასტან. მათ საკრებულოს ფრაქციის „ქართული ოცნება - დემოკრატიული საქართველოსთვის“ თავმჯდომარის რიმა ბერაძის მიერ შეთავაზებულ 3000-ლარიან ერთჯერად კომპენსაციაზე უარი თქვეს. მოვაჭრეების განმარტებით, ეს წინადადება უსამართლოა და ვერ ფარავს მათ ფინანსურ ზარალს. ისინი მინიმუმ, 5000-ლარიანი კომპანსაციის გაცემას ითხოვენ.

შეგახსენებთ, რომ სავაჭრო ცენტრ „ბავშვთა სამყაროში“ ხანძარი 30 იანვარს გაჩნდა, რომლის შედეგად 1000-ზე მეტი მოვაჭრე დაზარალდა. გამოძიება ხანძრის გამომწვევ მიზეზებზე ამ დრომდე მიმდინარეობს.

ანა მებურიშვილი