საზოგადოება

„ბავშვთა სამყაროს“ მოვაჭრეები სავაჭრო ცენტრის დირექტორის დაკავებას ეთანხმებიან, ცენტრის მოიჯარეები და აქციონერები კი აპროტესტებენ

სავაჭრო ცენტრ „ბავშვთა სამყაროში“ გაჩენილი ხანძრის შედეგად დაზარალებული მოვაჭრეები მთავარ პროკურატურასთან აქციას მართავენ. აქციის მონაწილეები გამოეხმაურნენ სავაჭრო ცენტრის დირექტორისა და უსაფრთხოების სამსახურის თანამშრომლის დაკავების ფაქტს.

ლია ვასაძის თქმით, შენობაში ხანძრის გაჩენაში პასუხისმგებლობა დირექციასა და დაცვას აკისრია.

„პირადად მაჭავარიანს ხელს ვერ ვადებთ, მაგრამ პირველი მოთხოვნა მას წავუყენეთ, რადგან ჩეკს მათ ვაძლევდით, ჩვენი ქონება ებარათ მაგათ. დღე ჩვენ ვიცავდით და ღამე უნდა დაეცვათ დაცვასა და დირექციას. ამიტომ პირველი დამნაშავეები არიან დაცვიდან დაწყებული დირექტორამდე“, - განაცხადა ვასაძემ.

მოვაჭრეები პროკურატურასთან სადღეღამისო აქციას უკვე ერთი კვირაა მართავენ. ისინი დაშლას მანამდე არ აპირებენ, სანამ ზარალს სრულად არ აუნაზღაურებენ.

პარალელურად იუსტიციის სამინისტროსთან „ბავშვთა სამყაროს“ აქციონერები და მოიჯარეები სავაჭრო ცენტრის დაკავებული დირექტორის გათავისუფლების მოთხოვნით აქციას მართავენ. აქციის მონაწილეთა თქმით, გიორგი მაჭავარიანი უდანაშაულოა, ხოლო შენობაში უსაფრთხოების წესები დაცული იყო.

თავიდან, აქციონერები და მოიჯარეები აქციის გამართვას პროკურატურასთან აპირებდნენ, მაგრამ მოვაჭრეებთან უსიამოვნების თავიდან ასაცილებლად, იუსტიციის სამინისტროსთან შეიკრიბნენ.

პროკურატურამ „სავაჭრო სახლი ბავშვთა სამყაროს“ დირექტორი გიორგი მაჭავარიანი და უსაფრთხოების სამსახურის თანამშრომელი მიხეილ თევზაძე გუშინ დააკავა. პროკურატურის ინფორმაციით, მაჭავარიანი სახანძრო უსაფრთხოების წესის დარღვევის გამო, ხოლო თევზაძე სამსახურებრივი გულგრილობის ფაქტზე დააკავეს.

გიორგი მაჭავარიას ბრალი უკვე წარედგინა. მისი ადვოკატის, გაგი მოსიაშვილის თქმით, ბრალი წარდგენილია სახანძრო უსაფრთხოების წესის დარღვევის გამო.]

მისივე ინფორმაციით, დაკავებული ბრალს არ აღიარებს.

მაჭავარიანისადმი წაყენებული ბრალი 4-დან -6 წლამდე პატიმრობას ითვალისწინებს.

ანა მებურიშვილი