საზოგადოება

„ბავშვთა სამყაროს“ მიმდებარე ტერიტორიაზე მოვაჭრეებმა მთავრობის ადმინისტრაციასთან აქცია გამართეს

მთავრობის ადმინისტრაციასთან „ბავშვთა სამყაროს“ მიმდებარე ტერიტორიაზე მოვაჭრეებმა აქცია გამართეს. ისინი სახელმწიფოსგან ითხოვენ ხანძრის შედეგად მიღებული ზიანის ანაზღაურებას.

აქციის ერთ-ერთი მონაწილის, ნათია ცანკაშვილის თქმით, 600-მდე მოვაჭრეა დაზარალებული.

„შევიკრიბეთ იმ მიზეზით, რომ დავდგებით ყველანი ერთად, იმიტომ, რომ 600-მდე ადამიანის ოჯახი დარჩა ლუკმა-პურის გარეშე. არანაირი შემოსავალი ჩვენს ოჯახებს არ გააჩნიათ“, - განცხადა ცანკაშვილმა.

აქციის ერთ-ერთი ორგანიზატორი, ადვოკატთა ასოციაციის თავჯდომარე, ზაზა ხატიაშვილი ხელისუფლებას 10-დღიან ვადას აძლევს, რომ მოვაჭრეები სამუშაო ადგილებს დაუბრუნდნენ და მათ ზარალი აუნაზღაურდეს.

„ვაფრთხილებთ ხელისუფლებას, თუ 10 დღის განმავლობაში არ მოხდება ამ ხალხის ზარალის დათვლა და ანაზღაურება, თუ ამ ადამიანებს არ მიეცათ იმის საშუალება, რომ გააგრძელონ მუშაობა იმავე ადგილზე, ვპირდებით, რომ კარდაკარ ვივლით, მთელ თბილისს გამოვიყვანთ და მთელ საქართველოს, რამდენიმე ქალაქში გავაკეთებთ აქციას, იმიტომ რომ ადამიანების მიტოვება და თითოეული ადამიანის სახლში ჯდომა, და სეირის ყურება, არის სიბინძურე!“, - ამბობს ადვოკატთა ასოციაციის თავმჯდომარე.

ხატიაშვილმა აქციის მონაწილეებს გააცნო გეგმა, რომელიც ითვალისწინებს ზარალის დათვლას, კომპენსაციის გადახდას, მოვაჭრეების დასაქმების შემთხვევაში, მათთვის 1-წლიანი შეღვათების დაწესებასა და საპროცენტო განაკვეთის 1 წლით შეწყვეტას.

ანა მებურიშვილი