საზოგადოება
ბაზრობები მთელი პასუხისმგებლობით ეკიდებიან ამ პრობლემის მოგვარებას - დიდუბის რაიონის გამგებელი გარემოვაჭრეებზე
დიდუბის რაიონის გამგებლის ირმა ზავარდაშვილის განცხადებით, იმ მოვაჭრეებს, რომლებიც მერიის რეგულაციის მიხედვით ვეღარ გააგრძელებენ გარევაჭრობას დინამოს მიმდებარე ტერიტორიაზე, სხვადასხვა ბაზრობები ფართებს გამოუყოფენ.
„სპეციფიკის მიხედვით, ვინ რითი ვაჭრობდა, აარჩევინებენ ბაზრის მეპატრონეები ადგილს და ეს არ იქნება, გინდა თუ არა, აქ დადექი თუ იქ. ამას მე ყურადღებას მივაქცევ, იმიტომ რომ ბაზრობები მთელი პასუხიმსგბლობით იღებენ ამ პრობლემის მოგვარებას“, - განაცხადა ზავარდაშვილმა.
შეგახსენებთ, რომ თბილისის მერიის ზედამხედველობის სამსახურმა გარემოვაჭრეთა დახლები აიღო. ახალი რეგულაციების თანახმად, გარემოვაჭრეები იქ საქმიანობის გაგრძელებას ვეღარ შეძლებენ. პროტესტის ნიშნად გარემოვაჭრეებმა დინამოს მიმდებარე ტერიტორიაზე აქცია გამართეს.
თბილისის ბაზრობათა ასოციაციამ უკვე შესთავაზა მოვაჭრეებს, გადაინაცვლონ ბაზრობებზე, სადაც 6 თვის განმავლობაში არცერთი გარემოვაჭრე დახლის საფასურს არ გადაიხდის. გარემოვაჭრეები ასოციაციის შეთავაზებას არ იღებენ, მათი თქმით, სალარო აპარატის გამოყენების გამო ისინი მოგების გარეშე დარჩებიან.
თბილისის მერიამ უნებართვო გარევაჭრობის წინააღმდეგ კამპანია 19 მარტს დაიწყო. ჯერ დახლები გაიტანეს მეტრო „მარჯანიშვილის“ ტერიტორიიდან, შემდგომ ბარათაშვილის ქუჩიდან და კოლმეურნეობიდან.
ანა მებურიშვილი