საზოგადოება
ბევრად უფრო ნაკლები ხარჯი იქნება, სწორედ ამიტომ არის საუბარი მიწისზედა მეტროზე - მამუკა სალუქვაძე
თბილისში მიწისზედა მეტროს მშენებლობის იდეას „სითი ინსტიტუტის“ გენერალური დირექტორი მამუკა სალუქვაძე გამოეხმაურა.
გენერალური გეგმის ავტორი აცხადებს, რომ მერიას აღნიშნული ინიციატივა მათ შესთავაზეს.
მამუკა სალუქვაძის თქმით, სამგორი-ორხევის აეროპორტის მიმართულება პრიორიტეტი იმიტომ გახდა, რომ აქ ინფრასტრუქტურა უკვე არსებობდა და შესაბამისად მშენებლობა ნაკლებ ხარჯთან იქნება დაკავშირებული.
„ბევრად უფრო ნაკლები ხარჯი იქნება, სწორედ ამიტომ არის საუბარი მიწისზედა მეტროზე და არა მიწისქვეშა მეტროზე, რომელსაც რამდენადმე მეტი სახსრების დახარჯვა დასჭირდება,“- განაცხადა სალუქვაძემ.
საკითხის კომენტირებისას ,,საქართველოს ალიანსი უსაფრთხო გზებისთვის” გამგეობის თავმჯდომარე, ეკა ლალიაშვილი ამბობს, რომ საბოლოო გადაწყვეტილებამდე დეტალური კვლევა უნდა ჩატარდეს.
„საჭიროებს სიღრმისეულ შესწავლას. გაჟღერდა ასევე, რომ 90 მილიონი შეიძლება დაჯდეს ეს პროექტი. თავად კონცეფცია არის ძალიან კარგი, მაგრამ უნდა კარგად ავწონ-დავწონოთ, რამდენად გამოყენებადი იქნება და გვიღირს ამ რესურსის ჩადება. შესაძლოა, სხვა ალტერნატიული ტრანსპორტი განვავითაროთ და რესურსი უფრო ხელსაყრელი და დაზოგილი იქნას,“- განაცხადა “საქართველოს ალიანსი უსაფრთხო გზებისთვის” გამგეობის თავმჯდომარემ, ეკა ლალიაშვილმა.