საზოგადოება
ბიბილოვმა გაიარა სერბეთის ტერიტორია, მაგრამ მას არცერთი ოფიციალური შეხვედრა არ ჩაუტარებია - საქართველოს ელჩი სერბეთში
საბერძნეთში საქართველოს საგანგებო და სრულუფლებიანი ელჩის (ასევე აკრედიტებულია სერბეთის რესპუბლიკაში), იოსებ ნანობაშვილის განცხადებით, სამხრეთ ოსეთის დე-ფაქტო პრეზიდენტს, ანატოლი ბიბილოვს სერბეთში ყოფნისას არცერთი ოფიციალური შეხვედრა არ ჩაუტარებია.
„ბიბილოვმა გაიარა სერბეთის ტერიტორია, მაგრამ მას არცერთი ოფიციალური შეხვედრა, საპატრიარქოს ჩათვლით, სერბეთის ტერიტორიაზე არ ჩაუტარებია. დღეს საუბრისას ამ თემას ორივე მხარე შეეხო. სერბეთის ეროვნული ასამბლეის სპიკერმა აღნიშნა, რომ ასეთი უსიამოვნო ინციდენტები სერბეთის ეროვნულ ინტერესებს ეწინააღმდეგება. საუბარიც არ არის რაიმე სახის ოფიციალურ შეხვედრაზე, თუმცა ყოველი ასეთი ინციდენტის აღმოჩენისას ამგვარ აქტებს დაგმობენ. სხვა მხრივ, ქვეყნების შორის თანამშრომლობა ტერიტორიული მთლიანობის დაცვის კუთხით, რა თქმა უნდა, გაგრძელდება და აქ არანაირი ორაზროვნება არ არსებობს“,-თქვა ნანობაშვილმა საქართველოს პარლამენტის თავმჯდომარის ირაკლი კობახიძის სერბეთის ეროვნული ასამბლეის სპიკერთან მაია გოიკოვიჩთან შეხვედრის დასრულების შემდეგ.
ელჩის თქმით, სერბეთის პატრიარქმა პირადად დაუდასტურა, რომ მისი შეხვედრა ბიბილოვთან და სამხრეთ ოსეთის დელეგაციასთან არაოფიციალური იყო.
ნანობაშვილმა აღნიშნა, რომ პრობლემას ქმნის ისეთი ფაქტორები, როგორიცაა ზოგიერთი პირის გადაადგილება რუსული პასპორტებით. ელჩის ვარაუდით, ბიბილოვი სწორედ რუსული პასპორტით გადაადგილდებოდა.
სამხრეთ ოსეთის დე-ფაქტო რესპუბლიკის პრეზიდენტი ანატოლი ბიბილოვი სერბეთის მართლმადიდებელი ეკლესიის პატრიარქ ირინეოს 12 იანვარს შეხვდა. შეხვედრა სერბეთის პატრიარქის რეზიდენციაში შედგა. ამასთან დაკავსირებით საქართველოს საპატრიარქომ სერბეთის საპატრიარქოს 15 იანვარს წერილი გაუგზავნა.