პოლიტიკა
ბიძინა ივანიშვილი დაბარებული იქნება ინგლისის სასამართლოში - ზაზა ოქუაშვილი
„მე ვარ ბრიტანეთის მოქალაქე და ვარ ყველაზე დიდი ინვესტორი ბრიტანეთიდან საქართველოში, ეს სტატუსი მაქვს მონიჭებული“,- ამის შესახებ „ომეგა ჯგუფის“ დამფუძნებელმა, ზაზა ოქუაშვილმა „რუსთავი 2“-ის გადაცემა „კვირის აქცენტებში“ განაცხადა.
ბიზნესმენმა მადლობა გადაუხადა ბრიტანეთის ელჩს, რომელმაც „მათ დიპლომატიური მხარდაჭერა გამოუცხადა“.
„მადლობა მინდა გამოვთქვა ბრიტანეთის ელჩისადმი, რომელმაც თავის გამოსვლაში მხარი დაგვიჭირა დიპლომატიურად“,- განაცხადა ოქუაშვილმა.
შეკითხვაზე, ელოდა თუ არა ლევან ყიფიანის ვერსიას, რომ ოქუაშვილს ჩანაწერები და ყიფიანის სახელი და გვარი ბრიტანეთში ინვესტორებთან გამოადგებოდა, ოქუაშვილმა უარყოფითად უპასუხა.
„არ ვიცი, რანაირი გვარიშვილია ასეთი ლევან ყიფიანი, მით უმეტეს – ინგლისისთვის“, - აღნიშნა ბიზნესმენმა.
ამასთანავე ოქუაშვილმა ხაზი გაუსვა, რომ ქვეყნის ყოფილ პრემიერ-მინისტრ ბიძინა ივანიშვილს „ომეგა ჯგუფის“ საქმეზე ინგლისის სასამართლოში პასუხის გაცემა მოუწევს.
მან ასევე აუდიოჩანაწერებზე სამხარაულის ექსპერტიზის დასკვნას უნდობლობა გამოუცხადა და განაცხადა, რომ ფირებს ინგლისსა და საფრანგეთში ექსპერტიზა ჩაუტარდებათ.
„ბიძინა ივანიშვილი დაბარებული იქნება ინგლისში სასამართლოზე. იქ იქნება კრიმინალური საქმე ივანიშვილის წინააღმდეგ, იმ დარღვევებზე, იმ თანხის გათეთრებაზე, იმ ყაჩაღობაზე, დავარქვათ - ფულის გამოძალვაზე, რასაც მსოფლიო ცივილიზაცია ებრძვის და მითუმეტეს საფრანგეთი, როდესაც იცის, რომ მისი მოქალაქე, საფრანგეთის მოქალაქე სჩადის ამას.
ნუ დახარჯავენ ენერგიასა და დროს ავთენტურობაზე, ორიგინალობაზე. ყველა მინდა რომ დავარწმუნო, რომ „რუსთავი 2“-დან მე ეს წამოვიღე და ჩავაბარე, როგორც საფრანგეთში, ასევე ინგლისში სახელიან ფირმებს, რომლებიც ყველაფერს დეტალურად დაადასტურებენ,“-განაცხადა ოქუაშვილმა.