საზოგადოება
Biltmore Hotel Tbilisi-ს მუშები საპროტესტო აქციას მართავენ
სასტუმრო ბილთმორ თბილისის მუშები სასტუმროს შესასვლელთან საპროტესტო აქციას მართავენ.
სასტუმროს მშენებლობაზე დასაქმებულები ამბობენ, რომ მათ ხელფასის დავალინების გადახდაზე ხელმძღვანელობა უარს ეუბნება.
აქციის მონაწილეების თქმით, სასტუმროს მფლობელის შეიხის ვიზიტისთვის მათ ერთი თვის დავალიანება დაუფარეს და სრულად თანხის დაფარვას საქართველოდან შეიხის წასვლის შემდეგ დაპირდნენ, თუმცა ამ დრომე მათ კუთვნილი ხელფასი არ მიუღიათ.
„150-მდე კაცია დაზარალებული. ვინც არის დაზარელებული აქ არის. არავის არ აქვს აღებული ბოლო ხელფასი. ზოგს ორი თვის ხელფასი არ აქვს აღებული. გვეუბნებიან, რომ თურქებისგან აიღე, თურქს მოსთხოვე. თურქს რა მოვსთხოვო მე? აქ ვიმუშავე, „დავი გრუპში“ ვიმუშავე. აქ არის მთელი უფროსობა და გარეთ არავინ არ გამოდის და პასუხს არ გვაძლევნ. ვის მოვსთხოვოთ? მოვიდეს მთავრობა და დაგვიდგეს გვერდზე. არაბეთი ხომ არ არის ხალხი მონასავით რომ ამუშავო და ფული არ გადაიხადო. მიჩვეულები არიან ესენი. ჩვენი შვილების ლუკმა ვის უნდა შევარჩინოთ. ყველას ვალები აქვს და ბანკში არიან შესულები. ხალხს თავისი ნამუშევარი უნდა“,- განუცხადა ჟურნალისტებს აქციის ერთ-ერთმა მონაწილემ ელშად მამედოვმა.
შეგახსენებთ, რომ Biltmore Hotel Tbilisi 31 ივლისს გაიხსნა და იგი სტუმრებს სექტემბრიდან მოემსახურება.
სასტუმრო არაბეთის გაერთიანებული ემირატების ინვესტიციით აშენდა და მასში 140 მილიონი დოლარი ჩაიდო.
ბილთმორი ლუქს-კლასის სასტუმროების ბრენდია, რომელმაც საქართველოში Millennium & Copthorne-ის პირველ წარმომადგენლობა გახსნა.
Millennium & Copthorne Hotels მსოფლიოში 120 სასტუმროს მფლობელი, აქტივების ან ბიზნესის მმართველია.
ემირატების “დაბი ჯგუფს” (Abu Dhabi Group) საქართველოში უკვე ორი მსხვილი ინვესტიცია აქვს განხორციელებული, რომელთა ჯამური ღირებულება 250 მილიონ დოლარს შეადგენს — “ბილთმორ თბილისი” და “ტერაბანკი”.
მონიკა დავლიანიძე