საზოგადოება

#ბოიკოტისაზმაუს - მწერლებისა და ცნობილი ადამიანების ნაწილმა ზვიად რატიანის საქმეზე გამოქვეყნებული ვიდეოს გამო არხს პროტესტი გამოუცხადა

მწერლების, გამომცემლებისა და სხვა ცნობილი ადამიანების ნაწილმა საზოგადოებრივ მაუწყებელს ბოიკოტი გამოუცხადეს. საქმე ეხება პოეტ ზვიად რატიანის საქმეზე არხის მიერ გამოქვეყნებულ შსს-ის ვიდეოს.

„მე, როგორც საზოგადოების ერთი რიგითი წევრი, ბოიკოტს ვუცხადებ ანტისაზოგადოებრივ მაუწყებელს! ჟურნალისტებისადმი სიმპათიის მიუხედავად, სანამ ეს ანტისაზოგადოებრივი შანტრაპა გააგრძელებს თავის წამქეზებლურ და სიმულაციურ საქმიანობას, როგორც რესპოდენტი ერთმნიშვნელივნად ვწყვეტ ამ ტელევიზიასთან თანამშრომლობას. ასე არ გამოვა, მეგობრებო, ერთი მხრივ, პოეტის ლექსებს ციტირებდე და მეორე მხრივ, საჯიჯგნად და საგინებლად სწირავდე ამავე ადამიანს! ბოიკოტი ანტისაზოგადოებრივ მაუწყებელს!“, - დაწერა მწერალმა და პუბლიცისტმა ლაშა ბუღაძემ ფეისბუკის საკუთარ გვერდზე.

საპროტესტო კამპანიაში ჩაერთო არხის ყოფილი თანამშრომელი, მწერალი რატი ამაღლობელი.

„რამდენიმე წელი ვმუშაობდი საზოგადეობრივ მაუწყებელზე,

ძალიან მიყვარს ის ხალხი, ვისთან ერთადაც ვაკეთებდი სხვადასხვა პროექტს - მაუწყებლის რადიოში; „ხმების ისტორია“, ტელესივრცეში, „ჩემი წიგნი“ და „სიტყვების თამაში“.

დღემდე მაქვს და ვიცი, რომ დიდხანს გამყვება ამ ხალხის სიყვარული და პატივისცემა,

მაგარამ ის, რაც იკადრა მაუწყებლის ახალმა მენეჯმენტმა ზვიად რატიანის ე.წ. ვიდეოს დადებით - აღარ მიტოვებს მორალურ უფლებას, რაიმენაირი სახით ვითანამშრომლო ხსენებულ მედიასაშუალებასთან როგორც რესპოდენტმა, მოწვეულმა სტუმარმა თუ მაყურებელმა. რადგან მათ გაწირეს უდანაშაულო მოქალაქე, შსს-სთან ერთად უკვე სამომავლოდაც საფრთხის ქვეშ დააყენეს მისი ჯანმრთელობა და უსაფრთხოება, დაარღვიეს პროფესიული ეთიკის ყველა სტანდარტი, შელახეს მისი რეპუტაცია და ღირსება. ასე რომ მოკლედ და კონკრეტულად ჩემგან #ბოიკოტისაზმაუს“, - წერია რატი ამაღლობელის ფეისბუკპოსტში .

ფილოსოფოსმა ირაკლი მაისურაძემ მომხდარის გამო საზმაუ „ბრბოს ტელევიზია“ უწოდა.

„#ბოიკოტისაზმაუს, დღეს თქვენ დაამტკიცეთ, რომ საზოგადოებრივი კი არა, ბრბოს ტელევიზია ხართ, „ასავალ-დასავლისა“ და „მარშალპრესისგან“ არ განსხვავდებით. როგორც დღეს 1930-იანი წლების საბჭოთა პრესა განიხილება ადამიანების ფიზიკური და მორალური განადგურების იარაღად, ასევე შევა ზვიად რატიანის დაკავების ვიდეო ჟურნალისტური ზნედაცემულობის ნიმუშად“, - დაწერა მაისურაძემ.

გუშინ ზვიად რატიანის საქმეზე სასამართლო სხდომა გაიმართა, რომელზეც შსს-მ პოლიციელების მიერ ჩაწერილი აუდიომტკიცებულება წარადგინა, სადაც ისმოდა, როგორ აგინებს პოეტი სამართალდამცველებს.

საზოგადოებრივმა მაუწყებელმა აღნიშნული ვიდეო შსს-სგან ოფიციალურად გამოითხოვა და გაავრცელა.

ვიდეო დამონტაჟებულია და სრულად არ ასახავს დაკავების პროცესს, არც იმას, თუ რამ გააღიზიანა ზვიად რატიანი.

ზვიად რატიანი 24 დეკემბრის ღამეს, საპოლიციო შემოწმების დროს დააკავეს. მას ედავებიან ხულიგნობასა და პოლიციის მიმართ დაუმორჩილებლობაში, ხოლო თავად პოეტი ამბობს, რომ სამართალდამცველებმა მასზე ფიზიკურად და ფსიქოლოგიურად იძალადეს.

ამ ინციდენტის გამო შინაგან საქმეთა სამინისტროს გენერალურმა ინსპექციამ გამოძიების დასრულებამდე მხოლოდ ერთ პოლიციელს შეუჩერა უფლებამოსილება.

ანა მებურიშვილი