რეგიონები
ბორჯომის საკრებულოს თავმჯდომარე ხელფასებთან დაკავშირებულ პრობლემებს ბორჯომის მერს უკავშირებს
ბორჯომის საკრებულოს თავმჯდომარე ზაზა ჩაჩანიძე ბორჯომის მერის ლევან ლიპარტიას განცხადებას გამოეხმაურა და აღნიშნა, რომ მერს თანამშრომლებისთვის იანვრის ხელფასის გაცემა უპრობლემოდ შეეძლო.
ჩაჩანიძე ხელფასებთან დაკავშირებით შექმნილ პრობლემას ბორჯომის მერს უკავშირებს, რადგან, მისი თქმით, აღმასრულებელ გადაწყვეტილებას სწორედ ის იღებს.
იმ შემთხევაში, თუ მერია სახელფასო მატების მოთხოვნას უცვლელი ფორმით წარადგენს, ოპოზიციური ფრაქციები მის მხარდაჭერას ისევ არ გეგმავენ.
ჩაჩანიძის თქმით, ხელფასების ზომიერად მომატების წინააღმდეგი არც ყოფილან და არც ახლა არიან.
„მე მინდა მთელ საქართველოსა და ჩემს ბორჯომელებს ვუხსნა, რომ დღეს მერი იტყუებოდა და მინდა ლევან ლიპარტიას შევახსენო, რომ იანვრის ხელფასები, მოუმატებელი საკრებულოში ჩაირიცხა მისი ხელმოწერით და ძალიან გული მწყდება, რომ არც საფინანსო და არც იურიდიული სამსახური ეუბნება მერს, რომ ის იტყუება. რატომ არ შეუძლია ჩაურიცხოს მერიის თანამშრომლებს ხელფასები? კარგად გაარკვიოს. მოაწეროს ხელი და ხვალვე დაუჯდებათ ხელფასი. ჩვენ გავუგზავნეთ ჩვენი ვერსია, ხელფასების მატების წინააღმდეგი არც ვყოფილვართ და არც ახლა ვართ, ზომიერად მოიმატონ“, – განაცხადა ზაზა ჩაჩანიძემ.
ცირა გურგენიძე