საზოგადოება

ბორჯომისა და ბაკურიანის ყოფილ მიტროპოლიტ სერაფიმეს წმინდა სინოდმა მღვდელმოქმედების უფლება აღუდგინა და მამათა მონასტერში გაამწესა

წმინდა სინოდმა ბორჯომისა და ბაკურიანის ყოფილ მიტროპოლიტ სერაფიმე ჯოჯუას მღვდელმოქმედების უფლება აღუდგინა, მამათა მონასტერში გაამწესა და ყოველთვიური ფინანსური დახმარება დაუნიშნა. გადაწყვეტილება საპატრიარქოში გამართულ დახურულ სხდომაზე მიიღეს.

შეგახსენებთ, სერაფიმე ჯოჯუა 2016 წლის აპრილიდან აღარ არის ბორჯომისა და ბაკურიანის მიტროპოლიტი. ის თანამდებობიდან ილია მეორესადმი გაგზავნილი პირადი თხოვნის საფუძველზე გაათავისუფლეს. შემდგომ ის გერმანიისა და ავსტრიის ეპარქიის მმართველად დანიშნეს, თუმცა ეს საკადრო ცვლილება გააპროტესტეს იქ მოღვაწე მართლმადიდებელმა სასულიერო პირებმა. მათ წერილი გამოაქვეყნეს, სადაც განაცხადეს, რომ მათთვის მიუღებელია ბორჯომისა და ბაკურიანის ყოფილი მიტროპოლიტის დანიშვნა, რადგან მან ბორჯომი „მრევლის მხრიდან უმძიმესი ბრალდებების გამო“ დატოვა. მათ გააფრთხილეს საპატრიარქო, რომ მეუფე სერაფიმეს დამოურჩილებლობას გამოუცხადებდნენ. წერილის საპასუხოდ სერაფიმე ჯოჯუამ უარი თქვა გერმანიისა და ავსტრიის ეპარქიის ხელმძღვანელობაზე. მან განმარტა, რომ მარტო ყოფნა და ლოცვა სურს.

გარდა ამისა, სინოდის გადაწყვეტილებით, ღვთისმსახურების უფლება აღუდგა მთავარეპისკოპოს ექვთიმეს , ხოლო ეპისკოპოს ქრისტეფორე წამლაიძეს მოუწოდეს, დაემორჩილოს სინოდს და წავიდეს მონასტერში სინანულისთვის.

დახურულ სხდომაზე ასევე განიხილეს მამა გიორგი მამალაძის საკითხი. საპატრიარქო ე.წ. „ციანიდის საქმეზე“ სააპელაციო-საკასაციო პროცედურების დასრულებამდე დეკანოზის მიმართ საბოლოო გადაწყვეტილებას არ მიიღებს.