საზოგადოება
ბოტანიკური ბაღის მიმდებარედ განაშენიანების გეგმის ფარგლებში, ხეების მოჭრის საკითხი ჯერ არ დამდგარა - დავით ნარმანია
თბილისის მერის დავით ნარმანიას განცხადებით, ბოტანიკური ბაღის მიმდებარედ და თაბორის მთაზე განაშენიანების გეგმის ფარგლებში, ხეების მოჭრის საკითხი ჯერ არ დამდგარა. ამის შესახებ ნარმანიამ ,,რუსთავი2“-ის ეთერში განაცხადა.
მისი თქმით, განაშენიანების რეგულირების გეგმა არის ჩარჩო-დოკუმენტი, რომელიც ამ ტერიტორიის საკმაოდ საინტერესოდ განვითარებას გულისხმობს.
,,გაშენიანების რეგულირების გეგმა, რომელზეც დედაქალაქის საკრებულომ იმსჯელა არის ჩარჩო დოკუმენტი, რომელიც გულისხმობს ამ ტერიტორიის საკმაოდ საინტერესოდ განვითარებას. მათ შორის დაგეგმილია გოლფ კლუბის გაკეთება, დამატებით გამწვანდება ტერიტორია.
კონკრეტული გენდროლოგიის პროექტი მომზადების სტადიაზეა და ის აუცილებლად იქნება შემოტანილი. ხეების მოჭრასთან დაკავშირებით საკითხი ჯერჯერობით არ დამდგარა,“-განაცხადა დავით ნარმანიამ.
ოქროყანას დასახლებაში, ბოტანიკური ბაღის მიმდებარედ არსებულ მიწის ნაკვეთზე სპორტულ-გამაჯანსაღებელი კომპლექსის გაშენებასთან დაკავშირებული პროექტი თბილისის საკრებულოში გუშინ, 24 ხმით 5-ის წინააღმდეგ დამტკიცდა. ფრაქცია ნაციონალური მოძრაობა - თბილისის თავმჯდომარის ირაკლი აბესაძის განცხადებით, საკრებულოს უმრავლესობამ არასრულყოფილი დოკუმენტაციის პირობებში დაამტკიცა ბოტანიკული ბაღის ყოფილ ტერიტორიაზე და მიმდებარედ არსებულ 300 000 კვ/მ ფართობზე განაშენიანების რეგულირების გეგმა, რასაც სავარაუდოდ, ათასობით ხის მოჭრა მოჰყვება.
მარი ნამგალაძე