საზოგადოება

ბრაზილიაში საქართველოს საელჩოს რიოს ოლიმპიურ თამაშებზე ქართული სპორტის განსაკუთრებული მხარდაჭერისთვის სპეციალური პრიზი გადაეცა

საქართველოს საგარეო საქმეთა მინისტრი, მიხეილ ჯანელიძე 2016 წლის საუკეთესო სპორტსმენის დაჯილდოების ცერემონიას დაესწრო. წლის საუკეთესო სპორტსმენის წოდება რიოს ოლიმპიადის ჩემპიონმა, მსოფლიოს რეკორდსმენმა ლაშა ტალახაძემ მოიპოვა.

როგორც მედიანიუსს საქართველოს საგარეო საქმეთა სამინისტროდან აცნობეს, საზეიმო საღამოზე ასევე გაიმართა სხვადასხვა ნომინაციაში გამარჯვებული სპორტსმენების დაჯილდოება და სპეციალური პრიზების გადაცემა. მათ შორის, რიოს ოლიმპიურ თამაშებზე ქართული სპორტის განსაკუთრებული მხარდაჭერისთვის, სპეციალური პრიზით დაჯილდოვდნენ ბრაზილიის ფედერაციულ რესპუბლიკაში საქართველოს საელჩოს თანამშრომლები და საგანგებო და სრულუფლებიანი ელჩი (2011-2016 წლები) ოთარ ბერძენიშვილი.

“ეს იყო ძალიან მნიშვნელოვანი მომენტი ჩვენი დიპლომატიური კორპუსისთვის, ასევე სამინისტროს თანამშრომლებისთვის, რომლებმაც გუნდურად ორი თვის გასნავლობაში ერთად ვუგულშემატკივრეთ ჩვენ თითოეულ სპორტსმენს. დიდი მადლობას მოგახსენებთ, იმისათვის რომ ეს პრიზი გადაეცა ჩვენს სამინისტროს, ჩვენს საელჩოს ბრაზილიის ფედერაციულ რესპუბლიკაში,“- აღნიშნა ოთარ ბერძენიშვილმა.

გალა-დაჯილდოებას მინისტრთა კაბინეტის წევრები, ეროვნული ოლიმპიური კომიტეტის წარმომადგენლები, ვეტერანი სპორტსმენები, ჟურნალისტები და გულშემატკივრები დაესწრნენ. ღონისძიებას სასტუმრო „ჰუალინგმა" უმასპინძლა.