პოლიტიკა

ჩემი ოჯახის წევრზეც იყო სამართალდამცავების ჩართვით ზეწოლის მცდელობა - გიორგი მარგველაშვილი

დაახლოებით ერთი თვის წინ ჩემი ოჯახის წევრზეც იყო სამართალდამცავების ჩართვით ზეწოლის მცდელობა, ეს იყო იმიტაცია რეალურად, - განაცხადა საქართველოს პრეზიდენტმა, გიორგი მარგველაშვილმა პრეზიდენტის ადმინისტრაციაში საკონსტიტუციო სასამართლოს თავჯდომარესთან, გიორგი პაპუაშვილთან შეხვედრის შემდეგ გამართულ პრესკონფერენციაზე.

როგორც მარგველაშვილმა აღნიშნა, პაპუაშვილისგან მან მიიღო ინფორმაცია, საკონსტიტუციო სასამართლოს მოსამართლეებზე ზეწოლის კონკრეტულ ფაქტებთან დაკავშირებით.

პრეზიდენტმა ის პოლიტიკოსებიც გააკრიტიკა, რომლებმაც, მისი თქმით, გიორგი პაპუაშვილის განცხადებას გაუგებარი შეფასებებით გამოეხმაურნენ.

,,მინდა, საზოგადოებას გავუზიარო ის, რომ საკონსტიტუციო თავმჯდომარის მიერ რამდენიმე დღის წინ გაკეთებულ განცხადებებზე პოლიტიკოსების გამოხმაურებები, რბილად რომ ვთქვათ, როგორც მინიმუმ იყო გაუგებარი.

როდესაც თანამდებობის პირი აცხადებს, ასეთ მნიშვნელოვან სახელმწიფო ინსტიტუტზე ზეწოლის შესახებ, ვფიქრობ, რომ ამაზე უნდა იყოს პოლიტიკოსების შეშფოთება. ბუნებრივია, უნდა იყოს მცდელობა ამ საქმეში დეტალურად გარკვევის.
მე დღეს ვესაუბრე ბატონ გიორგის და მან მე კონკრეტული ფაქტები დამისახელა. ეს კონკრეტული ფაქტები, თავისთავად, გამომდინარე იქიდან, რომ ეხება უმნიშვნელოვანეს სახელმწიფოებრივ ინსტიტუტს, ისეთს როგორიცაა საკონსტიტუციო სასამართლო და ისეთ თანამდებობის პირებს, როგორებიც არიან საკონსტიტუციო სასამართლოს მოქმედი მოსამართლეები, რომელთაც აქვთ უმაღლესი დაცვის ხარისხი ჩვენი კონსტიტუციის მიხედვით, თავისთავად ეს ფაქტი არის შემაშფოთებელი, იმიტომ, რომ ჩვენ ვლაპარაკობთ ჩვენი სახელმწიფოს დაცულობაზე, ჩვენი სახელმწიფო ინსტიტუტების დაცულობაზე.’’, - განაცხადა მარგველაშვილმა.

პრეზიდენტის თქმით, პაპუაშვილის მიერ მიწოდებულმა ინფორმაციამ ის არ გააოცა, რადგან ზეწოლის მცდელობა მისი ოჯახის წვერთან მიმართებაშიც განხორციელდა.

,,სამწუხაროდ, მინდა მოგახსენოთ, რომ ამ ფაქტებმა მე არ გამაოცა. საზოგადოებას მინდა ვუთხრა, რომ ეს ტენდენცია სამწუხაროდ, ახალი არ არის. დაახლოებით ერთი თვის წინ ჩემი ოჯახის წევრზეც იყო სამართალდამცავების ჩართვით გარკვეული ზეწოლის მცდელობა, ეს იყო იმიტაცია რეალურად. აქედან გამომდინარე, რაც მე მითხრა ბატონმა პაპუაშვილმა, ჩემთვის გასაოცარი არ არის’’, - განაცხადა მარგველაშვილმა.