კომენტარი

ჩემთვის მნიშვნელოვანია საპარლამენტო ოპოზიციის მხარდაჭერის მოპოვებაც - ნინო ლომჯარია

საპარლამენტო უმრავლესობის მიერ სახალხო დამცველის კანდიდატად დასახელებული ნინო ლომჯარია სასტუმრო „ლეოგრანდში“ მომხდარ ხანძართან დაკავშირებით ღრმა მწუხარებას გამოთქვამს.

ამასთან, ლომჯარია საპარლამენტო უმრავლესობის მიერ მისი კანდიდატურის დასახელების საკითხსაც გამოეხმაურა.

როგორც ნინო ლომჯარია სოციალურ ქსელში დაწერა, იგი მზად არის შეხვდეს ყველა საპარლამენტო ფრაქციას და გასცეს მათ შეკითხვებს პასუხი.

„პირველ რიგში მინდა ღრმა მწუხარება გამოვთქვა ბათუმში დაღუპული პირების გამო.

წუხანდელი ღამის ტრაგიკული მოვლენების გამო ვერ გამოვეხმაურე საპარლამენტო უმრავლესობის მიერ ჩემი კანდიდატურის დასახელებას სახალხო დამცველის პოსტზე. მინდა მადლობა გადავუხადო მმართველ ძალას ამ ძალიან საპასუხისმგებლო პოზიციაზე ჩემი კანდიდატურის მხარდაჭერისა და ამ პროცესში სამოქალაქო საზოგადოების პოზიციების გათვალისწინებისთვის!

დიდი მადლობა ვუთხრა არასამთავრობო სექტორს, თითოეულ თქვენგანს გამოხმაურებისა და მხარდაჭერისთვის!

წინ საპარლამენტო განხილვებია და აქვე მინდა გამოვხატო ჩემი მზადყოფნა, შევხვდე ყველა საპარლამენტო ფრაქციას, მათი სურვილის და ინტერესის შემთხვევაში და გავცე მათ შეკითხვებს პასუხი. ჩემთვის, როგორც სახალხო დამცველის კანდიდატისთვის, მნიშვნელოვანი იქნება, ამ პროცესში მოვიპოვო, ასევე, საპარლამენტო ოპოზიციის მზარდაჭერაც“,-წერს ლომჯარია.

მონიკა დავლაინიძე