პოლიტიკა
ჩემთვის მოსკოვში ვოიაჟები მიუღებელია მრავალი ფაქტორის გათვალისწინებით - ირაკლი სესიაშვილი
თავდაცვისა და უშიშროების საპარლამენტო კომიტეტის თავმჯდომარის, ირაკლი სესიაშვილის განცხადებით, მისთვის მიუღებელია ქართველი პოლიტიკოსების ვოიაჟები რუსეთში საქართველოს საერთო პოლიტიკური კურსის გაუთვალისწინებლად. ასე გამოეხმაურა დეპუტატი საპარლამენტო ფრაქცია „პატრიოტების“ თავმჯდომარის, გიორგი ლომიას ვიზიტს მოსკოვში.
„მე შეიძლება, არ მომწონდეს ის, რომ ქართველი პოლიტიკოსები მოსკოვში დადიოდნენ, მაშინ როდესაც ჩვენი ტერიტორიები ოკუპირებულია და რუსეთმა წლების განმავლობაში ჩვენი ჯარისკაცები და მოქალაქეები დაგვიხოცა. არ მსიამოვნებს, როცა ხელისუფლების საერთო პოლიტიკის გაუთვალისწინებლად, ჩვენი პოლიტიკოსები რუსეთში დადიან, თუმცა ესეც პოლიტიკის ნაწილია და ეს პოლიტიკური ძალა თვლის, რომ მას აქვს ხედვა ჩრდილოეთისკენ, არგუმენტად მოაქვთ, რომ ვესაუბროთ რუსეთს. ნებისმიერ შემთხვევაში, ეს არის პოლიტიკური ძალა, რომლებსაც სურთ, რომ არჩევნებში იმ ხალხის მხარდაჭერა მიიღონ, ვინც მათსავით ფიქრობს. ჩემთვის მოსკოვში ვოიაჟები მიუღებელია მრავალი ფაქტორის გათვალისწინებით“,- განაცხადა სესიაშვილმა.
როგორც ლომიამ „რუსთავი 2“-ს განუცხადა, ვრცელ კომენტარს მოსკოვის ვიზიტის შესახებ ის საქართველოში დაბრუნების შემდეგ გააკეთებს.