საზოგადოება

ჩვენ არ გვაქვს ექსტრა რესურსი, აზიური ფაროსანათი დაზარალებული მოსახლეობისთვის კომპენსაციების გასაცემად - ლევან დავითაშვილი

ჩვენ არ გვაქვს ექსტრა რესურსი, რომელიც შეგვიძლია გამოვიყენოთ აზიური ფაროსანათი დაზარალებული მოსახლეობისთვის კომპენსაციების გაცემის კუთხით, - განაცხადა სოფლის მეურნეობის მინისტრმა ლევან დავითაშვილმა პარლამენტში, აგრარულ საკითხთა კომიტეტის სხდომაზე, სადაც დეპუტატებს აზიური ფაროსანას წინააღმდეგ გატარებული და დაგეგმილი ღონისძიებების შესახებ ინფორმაცია მიაწოდა.

კომიტეტის წევრები დაინტერესდნენ სამეგრელოში აზიური ფაროსანათი დაზარალებული მოსახლეობისთვის კომპენსაციების დარიგების საკითხით.

როგორც ლევან დავითაშვილმა აღნიშნა, დაგეგმილია, რომ აზიური ფაროსანას წინააღმდეგ ბრძოლა გაძლიერდება.

"ბიუჯეტი არის გამჭირვალე და ყველამ ვიცით, რა რესურსი აქვს ქვეყანას. აქედან გამომდინარე ცალსახაა, რომ ჩვენ არა გვაქვს ის ექსტრა რესურსი, რომელიც შეგვიძლია გამოვიყენოთ ამ კუთხით. ვფიქრობთ, რომ ჩვენ რა რესურსსაც ვიპოვით და მოვიძიებთ უნდა გამოვიყენოთ პრობლემის მოგვარების კუთხით. ეს არის მთავარი ალბათ ამოცანა.

ჩვენ წელს უკვე მნიშვნელოვანი რესურსები გამოვყავით წლევანდელი ღონისძიებებისთვის მომავალი წლის ღონისძიებებისთვის. დაგეგმილია, რომ გაძლიერდეს ბრძოლის ღონისძიებები. ასევე გამოყოფილია ქიმიური საშუალებები, რომლებიც ექნება ფაქტობრივად ყველა იმ ოჯახს, რომელიც მავნებლის გავრცელების არეალშია", - განაცხადა დავითაშვილმა.