უახლესი ამბები
არქივი
მსოფლიო
ჩვენ არ ველოდით სიძულვილისა და ძალადობის ასეთ ხარისხს - რა მოჰყვა ანტიგლობალისტთა დემონსტრაციას ჰამბურგში
200-ზე მეტი დაკავებული დემონსტრანტი ბოლო ორი დღის განმავლობაში - ასეთი შედეგით დასრულდა ანტიგლობალისტთა საპროტესტო დემონსტრაცია ჰამბურგში მიმდინარე დიდი ოცეულის სამიტის წინააღმდეგ.
ჰამბურგის პოლიციის ინფორმაციით, 200-ზე მეტი პოლიციელი დაშავდა დემონსტრანტებთან შეტაკების შედეგად. განცხადებაში წერია, რომ აქციის მონაწილეები იყვნენ შეიარაღებულნი მოლოტოვის კოქტეილებითა და რკინის კოლოფებით.
„ჩვენ არ ველოდით სიძულვილისა და ძალადობის ასეთ ხარისხს“, - უთხრა ჰამბურგის პოლიციის პრესსპიკერმა ტიმო ცილმა ტაბლოიდ the Bild-ს.
ჰამბურგის პოლიციის ცნობით, აქციების მეორე დღეს დემონსტრანტები თავს ესხმოდნენ პოლიციას, განსაკუთრებით ქალაქის ცენტრალურ ნაწილში, აწყობდნენ ბარიკადებსა და ამსხრევდნენ მაღაზიებსა და სატრანსპორტო საშუალებებს.
ჰამბურგში ანტიგლობალისტური დემონსტრაციები ეფუძნება სლოგანს „კეთილი იყოს თქვენი მობრძანება ჯოჯოხეთში“. ძალადობრივი ხასიათი საპროტესტო აქციამ მიიღო ხუთშაბათს საღამოს, როცა დემონსტრანტებსა და პოლიციას შორის შეტაკებები მოხდა. პოლიციამ გამოიყენა წყლის ჭავლი და ცრემლსადენი გაზი აქციის მონაწილეთა წინააღმდეგ.
პარასკევ საღამოს გერმანიის კანცლერმა ანგელა მერკელმა ანტიგლობალისტთა ქცევა და პოლიციასთან შეტაკებები „მიუღებელი“ უწოდა.
„ჩემთვის მისაღებია ნებისმიერი მშვიდობიანი დემონსტრაცია, მაგრამ ძალადობრივი დემონსტრაციები საფრთხეს უქმნის ადამიანთა სიცოცხლეს, თავად ადამიანებს, პოლიციასა და სამართალდამცავ ძალებს, ადგილობრივებს. ამიტომ ეს მიუღებელია“, - თქვა მერკელმა.