საზოგადოება

ჩვენ ბოლო პერიოდში ასეთი მოვლენები არ გვახსოვს და ეს არაბუნებრივი სიტუაციაა - ლევან დავითაშვილი

სოფლის მეურნეობის მინისტრის, ლევან დავითაშვილის განცხადებით, ბორჯომის ხეობაში ხანძარი ლოკალიზებულია და წინა დღეებთან შედარებით სიტუაცია საგრძნობლად გაუმჯობესებულია. მისი თქმით, გადამწყვეტ როლს ამინდი შეასრულებს.

„პრემიერის ხელმძღვანელობით 24- საათიან რეჟიმში მუშაობს შტაბი. მოხდა რესურსების მაქსიმალურად მობილიზება და განაწილება. ატენის ხეობაში ხანძარი ლიკვიდირებულია. ბორჯომის ხეობაში მიმდინარეობს ინტენსიური სამუშაოები, რომელშიც ჩართულია ავიაცია, მძიმე ტექნიკა, 50-ზე მეტი სახანძრო ბრიგადა. ძალიან მნიშვნელოვანია, ამინდმა შეგვიწყოს ხელი. ძირითადი კერები ლოკალიზებულია, თუმცა იმისთვის, რომ მთლიანად მოხდეს ხანძრის ლოკალიზება საჭიროა ამინდის ხელშეწყობა. სიტუაცია არის საიმედო და მნიშვნელოვნად გაუმჯობესებულია წინა დღეებთან შედარებით“,- განაცხადა დავითაშვილმა.

ჟურნალისტის კითხვაზე, განიხილება თუ არა დივერსიის შესაძლებლობა, დავითაშვილმა უპასუხა, რომ ყველაფერს გამოძიება დაადგენს.

„ამ ეტაპზე ძალიან ძნელია რამის თქმა. მნიშვნელოვანია რას დაადგენს გამოძიება. ჩვენ ბოლო პერიოდში ასეთი მოვლენები არ გვახსოვს და ეს არაბუნებრივი სიტუაციაა გარკვეულწილად. ჩატარდება გამოძიება და დაადგენს, თუ რა იყო ხანძრის გამომწვევი მიზეზი“,- განაცხადა მინისტრმა.

შეგახსენებთ, ბორჯომის ხეობაში ხანძარი 20 აგვისტოს გაჩნდა. საგანგებო შტაბის ინფორმაციით, ხანძრის გავრცელება შეჩერებულია. ცეცხლის სალიკვიდაციო სამუშაოებში ქართულ მხარეს ეხმარებიან აზერბაიჯანი, თურქეთი, ბელორუსი და სომხეთი.

ანა მებურიშვილი