კონფლიქტის ზონა
ჩვენ მზად ვიყავით ფედერაციული ურთიერთობებისთვის, იყო კონფედერაციის ვარიანტი, მაგრამ ქართველები უარს ამბობდნენ - სერგეი შამბა
ოკუპირებული აფხაზეთის დე-ფაქტო რესპუბლიკის ყოფილი ე.წ. პრემიერ-მინისტრისა და საგარეო საქმეთა მინისტრის, სერგეი შამბას განცხადებით, ის პირველი იყო, ვინც თბილისთან ურთიერთობის დალაგებასა და „ერთობლივ მომავალზე“ დაიწყო საუბარი. ამის შესახებ შამბამ რუსულ რადიოსადგურ „Эхо Москва“-ისთან ინტერვიუში თქვა.
მისი თქმით, ახლა შესაძლებელია დიალოგის დაწყება თბილისთან.
„მე ვიყავი პირველი, ვინც დაიწყო საუბარი, რომ რაღაცნაირად უნდა დალაგდეს დიალოგი და დავფიქრდეთ ერთობლივ მომავალზე, იმ გაგებით, რომ ჩვენ ვართ მეზობელი ერები. არა მარტი ჩვენსა და საქართველოს შორის - მეზობელი ევროპული ერები ერთმანეთს ოდესღაც ეომებოდნენ. მაგრამ მერე მოდის დრო, როცა საჭიროა ურთიერთობების დალაგება. ვფიქრობ, რომ ახლა შესაძლებელია ასეთი დიალოგის დაწყება საქართველოსთანაც“, -თქვა შამბამ.
შამბას მტკიცებით, ის ქართველებს მტრად არ მიიჩნევს.
„არ მივიჩნევ ქართველებს მტრებად. მყავს მეგობრები საქართველოში. სიმართლე გითხრათ, კი, იყო ეთნიკური კონფლიქტი, მაგრამ უმეტესწილად, ის მაინც პოლიტიკური იყო“, -აღნიშნა შამბამ.
მისივე ნაამბობიდან ირკვევა, რომ აფხაზეთის კონფლიქტის წინ აფხაზური მხარე „ფედერაციული ურთიერთობების“ დამყარებისთვის მზად იყო.
„ვიმედოვნებდით, რომ შევთანხმდებოდით რაღაცა ფორმის ურთიერთობაზე. ჩვენ მაშინ ფედერაციულ ურთიერთობებს ვუჭერდით მხარს. შემდგომ, მოლაპარაკებების პროცესში იყო ვარიანტები, რომ შეგვეძლო კონფედერაციული შეთანხმების გაფორმება. შემდგომ პრიმაკოვის შუამდგომლობით განვიხილავდით „საერთო სახელმწიფოს“ ვარიანტსაც. ყველაფერზე ქართველები უარს ამბობდნენ, ქართული მხარე ყველა ამ პროექტზე უარს ამბობდა. ძალიან ხშირად ახლოს ვიყავით ხელმოწერასთან. მაგრამ ისე გამოვიდა, რომ ყოველთვის უარზე იყვნენ“, -აღნიშნა შამბამ.
მან დაამატა, რომ ახლა არცაა საუბარი „არც ფედერაციაზე, არც კონფედერაციაზე. ამან ყველაფერმა დიდი ხნის წინ ჩაიარა“.
„ის დრო აღარაა. ახლა უნდა ვისაუბროთ კეთილმეზობლურ ურთიერთობებზე“, -თქვა შამბამ.