პოლიტიკა
ჩვენ შევძლებთ, საზოგადოებაში შიში და ჰომოფობია დავამარცხოთ - თამარ ხულორდავა
ევროინტეგრაციის საპარლამენტო კომიტეტის თავმჯდომარე, თამარ ხულორდავა 17 მაისს დაგეგმილ აქციებს გამოეხმაურა. დეპუტატმა აღნიშნა, რომ სახელმწიფო შეძლებს საზოგადოებაში ჰომოფობიის დამარცხებას.
„აზრის გამოხატვის თავისუფლება უზრუნველყოფილი უნდა იყოს და უზრუნველყოფილია, რაც რამდენიმე დღის წინ ვნახეთ. დარწმუნებული ვარ, მათი მხრიდან აქციის გამართვის გადაწყვეტილება რომ ყოფილიყო მიღებული და ჩაეტარებინათ, ყველაფერი გაკეთდებოდა, რათა მათი უსაფრთხოება უზრუნველყოფილი ყოფილიყო.
ყველა ცივილიზებული საზოგადოება ის საზოგადოებაა, რომელიც ერთმანეთის განსხვავებულობას აფასებს და ყველა ადამიანს ისეთს იღებს, როგორიც არის. ჩვენ შევძლებთ, რომ საზოგადოებაში შიში და ჰომოფობია დავამარცხოთ. ეს ერთადერთი გზაა სწორი განვითარებისკენ“, – განაცხადა ხულორდავამ.
ცნობისთვის, დღეისთვის, 19 საათზე კანცელარიასთან დაგეგმილი ჰომოფობიასა და ტრანსფობიის საწინააღმდეგო აქცია ლგბტ-აქტივისტებმა გააუქმეს. „თანასწორობის მოძრაობის“ წარმომადგენელთა განმარტებით, მათ ეს ნაბიჯი სამოქალაქო დაპირისპირების თავიდან ასაცილებლად გადადგეს.
რუსთაველის გამზირზე დაგეგმილი აქცია „ქართულმა მარშმაც“ გააუქმა და ეს ლგბტ-აქტივისტების გადაწყვეტილებით ახსნა.
17 მაისს აღინიშნება ჰომოფობიასა და ტრანსფობიასთან ბრძოლის საერთაშორისო დღე, 2014 წლიდან, ამ დღის პარალელურად საპატრიარქო ოჯახის სიწმინდის დღეს აღნიშნავს.