პოლიტიკა

ჩვენ ვნახეთ, თუ როგორ შეიძლება ადამიანმა აიტანოს ისიც, როდესაც მას უზრდელად ექცევიან - თეა წულუკიანი ბიძინა ივანიშვილის ინტერვიუზე

იუსტიციის მინისტრმა თეა წულუკიანმა „ქართული ოცნების“ თავმჯდომარის, ბიძინა ივანიშვილის გუშინდელი ინტერვიუს კომენტირებისას განაცხადა, რომ ინტერვიუ საინტერესო გამოვიდა.

„ბატონი ბიძინა ივანიშვილის ინტერვიუ იყო საინტერესო. ჩვენ ვნახეთ, თუ როგორ შეიძლება ადამიანმა, რომელიც რესპონდენტიც არის, ასევე მედიატორობს დისკუსიების დროს, აიტანოს ყველანაირი შეკითხვა. უფრო მეტიც, არა მხოლოდ ისინი აიტანოს, არამედ დეტალური პასუხებიც გასცეს და აიტანოს ისიც, როდესაც მას უზრდელად ექცევიან“, – განაცხადა წულუკიანმა.

შეკითხვაზე, ეთანხმება თუ არა ბიძინა ივანიშვილის განცხადებას „რუსთავი 2“-თან დაკავშირებით, წულუკიანმა განაცხადა, რომ ამ თემაზე კომენტარისგან თავს იკავებს.

„რაც შეეხება „რუსთავი 2“-ს, ჩვენ ეს დავა მიგვყავს ჩვენი მხრივ. მხარეები ვართ, იუსტიციის სამინისტრო და „რუსთავი 2“ სტრასბურგის სასამართლოში წარმოვადგენთ ამ დავაში სახელმწიფოს, მთავრობას და ძალიან მალე ალბათ ვიხილავთ სტრასბურგის სასამართლოს გადაწყვეტილებას, რომლის გამოქვეყნებამდეც, მე, როგორც მხარე, ამ დავაში, ყველანაირ კომენტარისგან თავს შევიკავებდი“, – აღნიშნა წულუკიანმა.

ივანიშვილმა სამი წამყვანი არხის ჟურნალისტებთან ინტერვიუში განაცხადა, რომ არ ერთ წელიწადში ის მოახერხებს, რომ ყველაფერს თავისი სახელი დაერქვას და ყველამ თავისი ადგილი დაიკავოს, მათ შორის რუსთავი 2-მაც.

„მე დავბრუნდი პოლიტიკაში, სამწუხაროდ, და მე მოვახერხებ, რომ ის ვერტიკალი გუნდში გავამყარო, გუნდში ნიჭიერები უფრო წინ წამოვიდნენ და უფრო აქტიურები გახდნენ. უფრო მკაცრი მოთხოვნები იქნება „ქართული ოცნების“ ყველა წევრის მიმართ. მაქსიმუმ ერთ წელიწადში ჩვენ საზოგადოებაში ყველას თავისი სახელი ერქმევა და ყველას თავისი ადგილი ექნება. „რუსთავი 2“ ვერ შეძლებს საზოგადოების დიდი ნაწილი მძევლად ჰყავდეს და განსხვავებული აზრი არ მოისმინოს. თითქოს სახელმწიფო სახელმწიფოს ფუნქციას ვეღარ ასრულებს ვისაც არ უნდა ყველანი ქუჩაში გამოდიან. ბიზნესი, რომელიც არ უხდის ბიუჯეტს ფულს, გარბის "რუსთავი 2"-ზე და იქიდან გვემუქრება. დღეს ისეთი გრძნობა და შეგრძნებაა, თითქოს სახელმწიფო აღარ არსებობს დრეს ოქუაშვილი, რომელიც ფულს არ უხდის სახელმწიფო ბიუჯეტს...“, -თქვა ივანიშვილმა.