პოლიტიკა

ჩვენი ოჯახის სიცოცხლეს ემუქრება საფრთხე - თუბა ჩაბუქი

„დემირელის“ კოლეჯის მენეჯერის, მუსტაფა ემრე ჩაბუქის მეუღლის, თუბა ჩაბუქის განცხადებით, მასსა და მის ოჯახს ლიკვიდაციით ემუქრებიან. მისი თქმით, მუქარა განსაკუთრებით გაძლიერდა მედიისა და საზოგადოების მხარდამჭერი აქციების შემდეგ.

„მეუღლის დაკავების შემდეგ ჩემი ოჯახის მიმართ სხვადასხვა სახის მუქარებია. ეს განსაკუთრებით გაძლიერდა მას შემდეგ, რაც დაინახეს ქართველი ხალხისა და მედიის მხარდაჭერა. ერთ-ერთმა თურქულმა გაზეთმა ჩემი ოჯახი მოღალატედაც გამოაცხადა. მუქარები არის შემდეგი შინაარსის: უნდა გამოიგზავნოს აქ ჯგუფი, ჩემი ადგილი არის საფლავში.

ჩვენი ოჯახის სიცოცხლეს ემუქრება საფრთხე და აქედან გამომდინარე ვითხოვთ სახელმწიფო დაცვის დანიშვნას. სხვა ქვეყნებში უკვე დაფიქსირდა გატაცებისა და სხვა ფაქტები. ორი შვილის დედა ვარ, მეუღლე გვერდით არ მყავს და აუცილებლად მჭირდება დახმარება",- განაცხადა თუბა ჩაბუქმა პროკურატურაში დაგეგმილი შეხვედრის დაწყებამდე.

ამ დროისთვის თუბა ჩაბუქი თავის ადვოკატთან ერთად სახელმწიფო დაცვის დანიშვნის თაობაზე მთავარ პროკურატურაში შეხვედრას მართავს.