პოლიტიკა
ჩვენს დროში ცოტა წარმოუდგენელია, მაგრამ, ალბათ, ინკვიზიცია ასე იწყებოდა - დავით მაღრაძე ბესელია-გოგიჩაიშვილის ინიციატივაზე
„ალბათ, ინკვიზიციაც ასე იწყებოდა“, - ასე გამოეხმაურა პოეტი დავით მაღრაძე საპრლამენტო უმრავლესობის წევრების, ეკა ბესელიასა და ლევან გოგიჩაიშვილის საკანონმდებლო ინიციატივას, რომლის მიხედვით, სასამართლოს, შესაძლოა, გარკვეული შემოქმედებითი ნაწარმოების აკრძალვის უფლება მიენიჭოს.
„კვირის პალიტრასთან“ ინტერვიუში მაღრაძემ განაცხადა, რომ აღნიშნული ინიციატივის ამოქმედებით წარმოუდგენელი საფრთხეები გაჩნდება.
„კანონპროექტს არ ვიცნობ, მაგრამ, წინასწარ შემიძლია ვთქვა- მხატვრულ ნაწარმოებს, რა შინაარსისაც არ უნდა იყოს ის, არ სჭირდება აკრძალვა. ნაწარმოებში იქნება, თუ ცხოვრებაში, თუ ვინმე მეორე ადამიანს შეურაცხყოფს, დაჩაგრავს და ა.შ, არსებობს სხვა კოდექსები და მუხლები, რითაც შეიძლება გაასამართლონ დამნაშავე. არავის არ სჭირდება, ლექსებსა და სიმღერებს ცალკე მუხლები მივუყენოთ. დამნაშავე ნაწარმოებების ძებნა ვის რას არგებს, ან საერთოდ, განა შეიძლება დამნაშავე იყოს პოემა, ნახატი თუ მოთხრობა?! დაანებონ ნაწარმოებების დასჯაზე ფიქრს თავი. ჩვენს სასამართლოს გაცილებით ბევრი პრობლემა და საქმე აქვს, ვიდრე ლექსებსა და ნახატებზე ფიქრი... თუ რაღაც მიუღებელია და არ ვარგა, საზოგადოება იტყვის მასზე უარს, არ წაიკითხავს, არ ნახავს და მორჩება საქმე... წინააღმდეგი ვარ ასეთი კანონპროექტების შემოთავაზებისაც კი. აბსოლუტურად რომ ვერ წარმოვიდგენთ, შეიძლება ისეთი საფრთხეები გააჩინოს.
ჩვენს დროში ცოტა წარმოუდგენელია, მაგრამ ინკვიზიცია ასე იწყებოდა, ალბათ. შორს რომ არ წავიდეთ, კომუნისტური გამოცდილება გავიხსენოთ, შემოქმედებისთვის გასამართლებული და დახვრეტილი მწერლები, მხატვრები, რეჟისორები და ა.შ.. მოკლედ, ისე არ ვქნათ, რომ ქვეყანაში „სიკვდილმისჯილი“ ლექსები მივიღოთ“, - თქვა მაღრაძემ „კვირის პალიტრასთან“ ინტერვიუში.