პოლიტიკა
ჩვენს კანდიდატებს ემუქრებიან, აშინებენ და კანდიდატურის მოხსნას აიძულებენ - კახა კუკავა
„დემოკრატიული მოძრაობის“ თბილისის მერობის კანდიდატის კახა კუკავას ინფორმაციით, სხვადასხვა მუნიციპალიტეტში, მმართველი პარტია და „მასთან შეზრდილი უსაფრთხოების სამსახურები“ პარტიის მიერ წარდგენილ კანდიდატებს ემუქრებიან, აშინებენ და კანდიდატურის მოხსნას აიძულებენ.
„მმართველი პარტია და მასთან შეზრდილი უსაფრთხოების სამსახურები ჩვენს კანდიდატებს ემუქრებიან, აშინებენ და კანდიდატურის მოხსნას აიძულებენ“,- აცხადებს კუკავა.
მისივე თქმით, ზესტაფონის მუნიციპალიტეტის გამგებლის-ტარიელ თუთარაშვილისა და უსაფრთხოების სამსახურის თანამშრომლების ზეწოლის შედეგად კანდიდატურები მოხსნეს შორაპნის მაჟორიტარმა გოჩა ლაღუნდარიძემ და მეორე სვირის მაჟორიტარმა რომან ჯუღელმა.
„ასევე აიძულებენ ქალაქ ზესტაფონის მაჟორიტარს დავით გამცემლიძეს და ბლოკის სხვა კანდიდატებს, რომ მოხსნან კანდიდატურები საარჩევნო რეგისტრაციიდან. ანალოგიური ვითარებაა რაჭა-ლეჩხუმში, სადაც უსაფრთხოების ადგილობრივი სამსახურის ხელმძღვანელი ლევან ჯმუხაძე, გუბერნატორი არჩილ ჯაფარაძე და გოჩა ენუქიძე აიძულებენ ბლოკის კანდიდატებს, რომ მოიხსნან რეგისტრაციიდან. ასეთივე მდგომარეობაა ლაგოდეხის მუნიციპალიტეტში, სადაც სოფელ კაბალის მაჟორიტარს- შაჰინ მირზაევს აიძულებენ კანდიდატურის მოხსნას“,-განაცხადა კუკავა.
„დემოკრატიული მოძრაობა“ მიმართავს საერთაშორისო საზოგადოებას, რომ გამოიკვლიონ ზეწოლის ყოველი ფაქტი და მისცენ სამართლებრივი შეფასება საქართველოში წინასაარჩევნოდ მიმდინარე პროცესებს.
მონიკა დავლიანიძე