საზოგადოება

დაახლოებით 1200 ჭკვიანი კამერა გაარკვევს, აქვს გავლილი თუ არა მანქანას ტექდათვალიერება

შინაგან საქმეთა სამინისტროს ანალიზისა და რეფორმების სამმართველოს უფროსის, ბექა ლილუაშვილის განცხადებით, ავტომობილების ტექნიკური ინსპექტირების აღსრულების ნაწილი არაეფექტურია, რადგან საპატრულო ეკიპაჟების მხრიდან შემთხვევით პრინციპით ხდება შემოწმება, აქვს თუ არა ავტომობილს ტექდათვალიერება გავლილი.

ამ პრობლემის მოსაგვარებლად უწყება გეგმავს, რომ ტექნიკური ინსპექტირება მიბმული იყოს ვიდეოსამეთვალყურეო სისტემას.

„საპატრულო პოლიციის ეკიპაჟებით პერიოდული ტექნიკური ინსპექტირების აღსრულების ნაწილი საკმაოდ არაეფექტიანია, ამიტომ ჩვენ ვახორციელებთ ამ პროცესის მაქსიმალურად ავტომატიზებას, რაც ნიშნავს, რომ აღნიშნული პროცესი უნდა მივაბათ ვიდეოსამეთვალყურეო სისტემაზე, რაც გაზრდის ეფექტიანობას ტექნიკური ინსპექტირების აღსრულების ნაწილში. 2019 წლის დასაწყისიდან უკვე ყველა ავტომობილისთვის ხდება სავალდებულო ტექდათვალიერება. ეს დაახლოებით მილიონამდე სატრანსპორტო საშუალებაა“, -აღნიშნა ლილუაშვილმა.

მისი თქმით, ვიდეოსამეთვალყურეო სისტემის დანერგვა გულისხმობს დაახლოებით 1200 ჭკვიანი კამერის დამონტაჟებას მთელი საქართველოს მასშტაბით. ლილუაშვილმა აღნიშნა, რომ ამაზე სამუშაოები უკვე მიმდინარეობს.

„ჩვენ გვაქვს მოლოდინი, რომ ორთვიან პერიოდში დაახლოებით შესაძლებელი იქნება აღსრულების ნაწილი განხორციელდეს ვიდეოსამეთვალყურეო სისტემის გამოყენებით“, - თქვა შსს-ის ანალიზისა და რეფორმების სამმართველოს უფროსმა.

ტექდათვალიერება ამოქმედდა 2018 წლის 1-ლი იანვრიდან. ამ პერიოდიდან დღემდე პერიოდული ტექნიკური ინსპექტირების წესების დარღვევისთვის 2555 სატრანსპორტო საშუალება დაჯარიმდა.