საზოგადოება

დაგვიბრუნონ რაც გვეკუთვნის და წავალთ ჩვენ-ჩვენს სახლებში - დაპირისპირება „ბავშვთა სამყაროს“ მოვაჭრეების აქციაზე

პროკურატურასთან სავაჭრო ცენტრ „ბავშვთა სამყაროში“ გაჩენილი ხანძრის შედეგად დაზარალებული მოვაჭრეები აქციას მართავენ. მათი მოთხოვნები უცვლელია. ისინი მთავარი პროკურორის, ირაკლი შოთაძის გადადგომას ითხოვენ, დამნაშავეების დასჯასა და კომპენსაციის გადახდას.

აქციის დროს დაპირისპირება მოხდა მოვაჭრეებსა და პოლიციას შორის. სამართალდამცველებმა შეკრებილებს კარვის გაშლის საშუალება არ მისცეს. შეკრების ერთ-ერთი მონაწილე ნარგიზა კაცაძე ჩოჩქოლის გამო ცუდად გახდა და სასწრაფო დახმარების გამოძახება გახდა საჭირო.

„ან სიკვდილი, ან სიცოცხლე. ხომ ხედავს მთავრობა, რომ არ ვნებდებით. ჩვენ რაც გვეკუთვნის, დაგვიბრუნონ და წავალთ ჩვენ-ჩვენს სახლებში“, -უთხრა კაცაძემ ჟურნალისტებს.

„ბავშვთა სამყაროს“ მოვაჭრეების ადვოკატის, ფრიდონ სუხიაშვილის განცხადებით, საქმეზე გამოძიება დასრულებულია და სააქციო საზოგადოების დირექტორის გიორგი მაჭავარიანისა და პასუხისმგებელი მორიგის წინააღმდეგ საქმე უახლოეს დღეებში სასამართლოში გადაიგზავნება.

„გამოძიება დასრულდა, როგორც განაცხადეს და საქმე იგზავნება სასამართლოში. რაც შეეხება დღევანდელ აქციას, კვლავ განახლდა, მოთხოვნა კვლავ უცვლელია, რომ არა მარტო მაჭავარიანი და პასუხიმსგებელი მორიგე, არამედ ის კონკრეტული პირები, ვინც გადაწვეს ბავშვთა სამყარო, ის კონკრეტული პირები, ვინც შეუკვეთა ეს დანაშაული, ვინც აღასრულა, ყველა უნდა დასხდეს საბრალდებო სკამზე“, -თქვა ადვოკატმა.

„ბავშვთა სამყარო“ 30 იანვარს დაიწვა.

ანა მებურიშვილი