კომენტარი

დაკავება რეალურად მოხდა რესტორნის შიგნით, გაათრიეს შენობიდან, ჩატენეს მანქანაში - ანა მარგველაშვილი

პრეზიდენტის შვილი, ანა მარგველაშვილი იმედს გამოთქვამს, რომ მოსამართლე მისი მეგობრის, მიხეილ თათარიშვილის მიმართ სამართლიან განაჩენს გამოიტანს.

როგორც ანა მარგველაშვილმა დღევანდელი სასამართლო პროცესის დასრულების შემდეგ განაცხადა, დღეს დაკითხული მოწმეების ჩვენებები განსხვავდება პოლიციელების ჩვენებებისგან და დასტურდება, რომ თათარიშვილი სურამის გზატკეცილზე არ დაუკავებიათ.

"საერთოდ არ ემთხვევა ერთმანეთს პოლიციელებისა და იმ პერსონალის ჩვენებები, რომლებიც იმ რესტორანში მუშაობენ, სადაც მიხეილ თათარიშვილი დააკავეს.

განსხვავებულია იმით, რომ რეალურად რესტორნის შიგნით მოხდა დაკავება, გაათრიეს შენობიდან, ჩატენეს მანქანაში და არა ისე, თითქოს სურამის გზატკეცილზე მოხდა მისი აყვანა.

იმედია, მოსამართლე გაითვალისწინებს და სამართლიან განაჩენს გამოიტანს", - განაცხადა ანა მარგველაშვილმა.

ნინო ექვთიმიშვილი