სამართალი
დაკავებული დეკანოზი გიორგი მამალაძე ბრალს არ აღიარებს - ირაკლი შოთაძე
მკვლელობის მომზადების ფაქტზე დაკავებული დეკანოზი გიორგი მამალაძე, ბრალს არ აღიარებს.
შესაბამისი განცხადება მთავარმა პროკურორმა, ირაკლი შოთაძემ უწყებაში გამართულ ბრიფინგზე გააკეთა, სადაც მედიასთან დეკანოზის დაკავებასთან დაკავშირებით ბრიფინგი გამართა.
,,მან არ ჩათვალა საჭიროდ ჩვენების მიცემა. ფაქტობრივად დუმილის უფლებას იყენებს’’, - აღნიშნა მთავარმა პროკურორმა.
შოთაძის განცხადებით, გამგზავრებამდე დეკანოზს ბარგის ჩხრეკისას ფარულად შენახული შხამიანი ნივთიერება აღმოაჩნდა, რომლითაც გამოძიების ინფორმაციით, მას ,უნდა მოეხდინა მაღალი იერარქიის სასულიერო პირის სიცოცხლის ხელყოფა.
ამასთან, შოთაძე გამოიძიების ინტერესებიდან და უსაფრთხოების ზომებიდან გამომდინარე, არ აკონკრეტებს, იყო თუ არა ეს შხამიანი ნივთიერება განკუთვნილი პატრიარქისთვის და ამბობს, რომ ,,ერთი-ერთი პირის მიმართ მზადდებოდა მკვლელობა.’’
,,არსებობს მთელი რიგი მტკიცებულებები, მათ შორის არსებობს აუდიო და ვიდეოჩანაწერები, რომლებიც სასამართლოს განჩინების საფუძველზე იყო მოპოვებული, თუმცა საქმის სენსიტიურობიდან და იმ გარემობებიდან გამომდინარე, რომ გამოძიება გრძელდება, ჩვენ არ მიგვაჩნია ამ ეტაპზე მიზანშეწონილად ამ მტკიცებულებების გასაჯაროვება’’, - აღნიშნა ირაკლი შოთაძემ.
მისივე ინფორმაციით, მტკიცებულებებით გამოკვეთილი არის რამდენიმე ვერსია, რომლის მიხედვითაც ტარდება შესაბამისი საგამოძიებო მოქმედებები.
,,კონკრეტული პიროვნება, ვის მიმართაც იქნა მოპოვებული მტკიცებულებები შესაბამისი სტანდარტით დანაშაულის ჩადენის შესახებ, არის მიცემული სისხლის სამართლის პასუხისგებაში’’, - განაცხადა მთავარმა პროკურორმა.
მისივე ინფორმაციით, არაერთი მოწმეა დაკითხული და მათი დაკითხვა გრძელდება.
რაც შეეხება სოსო ოხანაშვილის დაკითხვას, მთავარი პროკურორის განმარტებით, ლოგიკური იყო მისი დაკითხვა, ვინაიდან იგი იყო პატრიარქის დაცვის უფროსი.
,,კითხვები ეხებოდა კონკრეტულად პატრიარქის დაცვას და კონკრეტულ პიროვნებას, იმას, თუ რა წვდომა ჰქონდა კონკრეტულ პიროვნებას პატრიარქთან და საქმის სხვა დეტალებს, რასაც აქვს საქმისათვის არსებითი მნიშვნელობა’’, - განაცხადა ირაკლი შოთაძემ.
როდესაც დეკანოზმა გიორგი მამალაძემ დაიწყო შხამიანი ნივთიერების მოპოვებაზე მუშაობა, პროკურატურა საწყის ეტაპზევე ჩაერთო საქმეში.
,,ჩვენ მოგვმართა მოქალაქემ, რომელიც დეკანოზის მოსაზრებით უნდა დახმარებოდა და შუამავლობა გაეწია მისთვის ამ შხამიანი ნივთიარების მოპოვებაში, შესაბამისად ინფორმაცია მანამადე სხვა, რომ მანამდე სხვა მოქმედებები ამ პირის მიერ ხორციელდებოდა, ჩვენ არ გვაქვს’’, - აცხადებს ირაკლი შოთაძე.
ნინო ექვთიმიშვილი