საზოგადოება

დახმარების მზადყოფნა გამოთქვეს აშშ-მ, ბრიტანეთმა, გერმანიამ, ისრაელმა, საბერძნეთმა, უკრაინამ, ბულგარეთმა და ირანმა- პრემიერ-მინისტრი

საქართველოს პრემიერ-მინისტრის, გიორგი კვირიკაშვილის ინფორმაციით, საქართველოს ბორჯომის ხეობაში ცეცხლის ჩაქრობაში დახმარება შესთავაზეს აშშ-მ, დიდმა ბრიტანეთმა, გერმანიამ, ისრაელმა, საბერძნეთმა, უკრაინამ, ბულგარეთმა და ირანმა.

„პირველივე დღიდან გამოითქვა დახმარების სურვილი და ჩვენ მივიღეთ დახმარება აზერბაიჯანისგან, თურქეთისგან, სომხეთისგან, ასევე ბელორუსისგან. მივიღეთ წინადადებები სხვა ქვეყნებიდანაც. გუშინ გამოითქვა ასევე დახმარების მზადყოფნა აშშ-ისგან, დიდი ბრიტანეთისგან, გერმანიისგან, ისრაელისგან, საბერძნეთისგან, უკრაინისგან, ბულგარეთისგან, ირანისგან“, - განუცხადა კვირიკასვილმა ჟურნალისტებს.

რაც შეეხება რუსეთის მიერ შემოთავაზებულ დახმარებას, კვირიკაშვილის შეფასებით, მიუხედავად ორ ქვეყანას შორის არსებული რთული ურთიერთობისა, ეს ჟესტი მისასალმებელი იყო.

„მინდა, შევეხო განსაკუთრებულად რუსეთის საკითხს, ვინაიდან ამ დღეების განმავლობაში ეს საკითხი იყო აქტიური განხილვის საგანი. რუსეთმა გამოთქვა მზადყოფნა დახმარების. ვფიქრობთ, რომ ეს წინადადება არის მისასალმებელი. ჩვენ გაგვაჩნია პასუხისმგებლობის მაღალი ხარისხი, ჩვენი მოსახლეობის და ჩვენი ქვეყნის წინაშე, სწორედ გამომდინარე პასუხისმგებლობის ამ მაღალი ხარისხიდან ვფიქრობთ, რომ იმ პირობებში, როდესაც ჩვენ გაგვაჩნია ძალიან რთული ურთიერთობა რუსეთთან, ასეთი წინადადება არის მისასალმებელი. ჩვენ ვაგრძელებთ აქტიურ მუშაობას. სიტუაცია კონტროლს ექვემდებარება და დღის განმავლობაში მოგახსენებთ სიტუაციის განვითარების შესახებ“, - თქვა პრემიერმა.

შეგახსენებთ, უკვე მეხუთე დღეა ბორჯომის ხეობაში ცეცხლის ჩაქრობას ცდილობენ.

ანა მებურიშვილი