პოლიტიკა

დარწმუნებული ვარ, საქართველოს მიერ მიღწეული პროგრესი იქნება აღიარებული - იენს სტოლტენბერგი

ივლისში, ნატოს სამიტზე ჩრდილოატლანტიკური გაერთიანების გზაზე საქართველოს პროგრესი იქნება აღნიშნული, მაგრამ რა ფორმით - ჯერ არ არის გადაწყვეტილი, - განაცხადა ნატო-ს გენერალურმა მდივანმა იენს სტოლტენბერგმა საქართველოს ევროატლანტიკური ინტეგრაციის პერსპექტივაზე საუბრისას.

მისი თქმით, რეფორმები საქართველოს ჩრდილოატლანტიკურ ალიანსში გაწევრიანების გზაზე დაეხმარება.

„ორგანიზაციის ყველა წევრმა მტკიცე მხარდაჭერა დააფიქსირა საქართველოს მიმართ და საქართველოს მისწრაფების მიმართ. ჩვენ გავაგრძელებთ საქართველოსთვის პრაქტიკული და პოლიტიკური დახმარების აღმოჩენას. წევრებმა მადლიერებით აღნიშნეს საქართველოს მონაწილეობა ნატო-ს მიერ წარმოებულ ოპერაციებში.

დარწმუნებული ვარ, საქართველოს მიერ მიღწეული პროგრესი იქნება აღიარებული და ჩვენ ვიპოვით გზებს. ზუსტად რა ფორმით იქნება პროგრესი ასახული, ჯერ გადაწყვეტილი არ არის. ჯერ სამიტის პროგრამა დეტალურად გადაწყვეტილი არ არის.

საქართველომ უნდა გააგრძელოს რეფორმები, შეიარაღებული ძალების მოდერნიზება, დააკმაყოფილოს ნატოს სტანდარტები, განამტკიცოს კანონის უზენაესობის დაცვა, უზრუნველყოს დამოუკიდებელი მართლმსაჯულება, ებრძოლოს კორუფციას. ეს არის კარგი საქართველოსთვის და ეხმარება საქართველოს წევრობის გზაზე“, – განაცხადა ნატო-ს გენერალურმა მდივანმა.