სამართალი
დასკვნაში არ იყო მითითებული, რომ აბესაძის ჯანმრთელობის მდგომარეობა შეუთავსებელია პატიმრობაში ყოფნასთან - პროკურორი
ქრთამის აღების ფაქტზე დაკავებული ოთარ აბესაძე პატიმრობაში რჩება. საქმის პროკურორის, ირაკლი მარშანიას განმარტებით, დაცვის მხარემ აბესაძისთვის აღკვეთის ღონისძიების შეცვლის შუამდგომლობა დააყენა და ამის საფუძვლად სამხარაულის ექსპერტიზის ბიუროს დასკვნა წარმოადგინა. პროკურორის თქმით, ჯანმრთელობის მდგომარეობის შესახებ ექსპერტიზის პასუხში არ იყო მოყვანილი არგუმენტები, რომლებიც აღკვეთის ღონისძიების სახით პატიმრობის შეცვლას გამოიწვევდა.
„დაცვის მხარე აპელირებდა სამხარაულის ექსპერტიზის ბიუროს დასკვნაზე და ითხოვდა, რომ ბრალდებულს აღკვეთის ღონისძიების სახით შეფარდებული პატიმრობა შეცვლოდა, თუმცა ამ დასკვნაში არ იყო მითითებული ისეთი გარემოება, რომელიც ამბობს, რომ ოთარ აბესაძის ჯანმრთელობის მდგომარეობა შეუთავსებელია მისი სასჯელაღსრულების დაწესებულებაში ყოფნასთან. აქედან გამომდინარე, მოსამართლემ არ გაიზიარა დაცვის მხარის შუამდგომლობა და შეფარდებული აღკვეთის ღონისძიება ძალაში დატოვა“, -აღნიშნა პროკურორმა.
დღეს დილით დაცვის მხარემ ბრალდებულის ჯანმრთელობის მდგომარეობის შესახებ ექსპერტიზის პასუხი მიიღო. აბესაძის ადვოკატმა, ლილი გელაშვილმა იმედი გამოთქვა, რომ მიღებული შედეგების საფუძველზე სასამართლო აღკვეთის ღონისძიებას შეცვლიდა.
ოთარ აბესაძე 11 ივლისს სუს-ის ანტიკორუფციული სააგენტოს თანამშრომლებმა ბრალდებულის სახით დააკავეს, რადგან მან ერთ-ერთ მოქალაქეს ქრთამის სახით გამოართვა 3000 დოლარი.
ანა მებურიშვილი