საზოგადოება

დაურეგისტრირებლობის გამო თბილისის მერიამ 11 სილამაზის სალონი დააჯარიმა

დედაქალაქში თბილისის მერიის გადამდებ დაავადებათა ეპიდზედამხედველობისა და კონტროლის ცენტრის გადაწყვეტილებით რეგისტრაციის არქონის გამო 11 სილამაზის სალონი დაჯარიმდა.

ცენტრის დირექტორმა ციცო დილებაშვილმა საქმის კურსთან განაცხადა, რომ საბოლოო განაჩენი სასამართლოს გამოაქვს, თუმცა, უმრავლეს შემთხვევაში სასამართლო სხდომების დროს სალონების მეპატრონეებს რეგისტრაცია უკვე გავლილი აქვთ და მოსამართლე სანქციას აღარ აკისრებს, თუმცა, ობიექტს ადმინისტრაციული პასუხისმგებლობა მაინც უფორმდება.

ჯარიმა დაურეგისტრირებლობის შემთხვევაში 500 ლარია.

დოლებაშვილის ინფორმაციით, რამდენიმეთვიანი მუშაობის შედეგად ცენტრმა მხოლოდ 2 ჯარიმა გამოიწერა სტერილიზაცია-დეზინფექციის მიმართულებით( ჯარიმის ოდენობაა 50 ლარი). ცენტრის ხელმძღვანელმა აღნიშნა, რომ ეს არ ასახავს რეალურ სურათს, სალონები პირველადი შემოწმებისას არ ჯარიმდებიან და მხოლოდ რეკომენდაციებს იღებენ, რომელთა გამოსასწორებლად ვადა ეძლევათ. დოლებაშვილის თქმით, პირველადი შემოწმებისას ყველა სალონში ფიქსირდება, მაგრამ მეორე შესვლაზე დარღვევების უმეტესობა გამოსწორებულია.

დილებაშვილმა აღნიშნა, რომ სალონებთან მუშაობა რთულია, რადგან ზოგიერთი მათგანი აცხადებს, რომ რეგულაციების შესახებ ინფორმაციას არ ფლობენ. ცენტრის ხელმძღვანელის თქმით, წელიწად-ნახევარია აღნიშნულ საკითხზე ჯანდაცვის სამინისტრო აქტიურად მუშაობს და დაინტერესებული პირებისთვის ინფორმაცია ღია და ხელმისაწვდომია.