არქივი
პოლიტიკა
დავით კირკიტაძემ და მისმა თანამებრძოლებმა ჩაშალეს ოლიგარქის გეგმები რუსთავში და პასუხმაც არ დააგვიანა - მიხეილ სააკაშვილი
საქართველოს ყოფილი პრეზიდენტი მიხეილ სააკაშვილი გაერთიანებული ოპოზიციის წევრის, დავით კირკიტაძის სახლთან სამართალდამცველების მობილიზებას გამოეხმაურა. ექს-პრეზიდენტის მტკიცებით, დავით კირკიტაძემ ბიძინა ივანიშვილს გეგმები ჩაუშალა, რადგან სალომე ზურაბიშვილმა რუსთავში საპრეზიდენტო არჩევნები წააგო.
სააკაშვილის აზრით, ზუსტად ამის გამო კირკიტაძეს დღეს სამართალდამცველებმა მიაკითხეს.
„ივანიშვილის ბანდამ უმეტეს ადგილებში შეძლო გაყალბებების მეშვეობით თავისი თოჯინასთვის „გამარჯვების“ დახატვა და რუსთავში ეს არ გამოუვიდა, ენმ ადგილობრივი ორგანიზაციის თავდადებული ბრძოლის გამო. დავით კირკიტაძემ და მისმა თანამებრძოლებმა ჩაშალეს ოლიგარქის გეგმები. პასუხმაც არ დააგვიანა - დღეს დილიდან ასობით პოლიციელი,რუსეთის საგარეო დაზვერვის აგენტის, გახარიას მეშვეობით, ცდილობს დათო კირკიტაძის დაპატიმრებას. ეს მხოლოდ დააჩქარებს ამ კანონის ფარგლებს იქით დიდი ხნის წინ გასული რეჟიმის აღსასრულს“, - დაწერა სააკაშვილმა ფეისბუკის საკუთარ გვერდზე.
ცნობისთვის, დღეს დავით კირკიტაძის სახლთან სამართალდამცველები იყვნენ მობილიზებული. როგორც შემდგომში შსს-მ განმარტა, დავით კირკიტაძის მიმართ გამოძიება პოლიციელის მიმართ განხორციელებული ძალადობის ფაქტზე მიმდინარეობს. საქმე ეხება გუშინ გურჯაანში, ველისციხესთან „ნაციონალური მოძრაობის“ წევრებსა და სამართალდამცველებს შორის მომხდარ დაპირისპირებას, რომელში კირკიტაძეც მონაწილეობდა.