საზოგადოება
დავით საყვარელიძეს ბრილიანტის მწვანე შეასხეს
უკრაინის გენერალური პროკურორის ყოფილ მოადგილეს, დავით საყვარელიძეს, ხარკოვში ბრილიანტის მწვანე შეასხეს.
როგორც თავად საყვარელიძემ Facebook-ში საკუთარ გვერდზე დაწერა, ხარკოვის „ტიტუშკების“ უფროსები გულუბრყვილოდ ვარაუდობენ, რომ ამით მას ან მისნაირებს შეაჩერებენ.
„სავარაუდოდ, მათ უნდოდათ ეჩვენებინათ, ვინ არის უფროსი და ვის ტერიტორიაზე გადასვლა არ შეიძლება. მინდა მათ იმედი გავუცრუო: ასე მარტივად არ დავნებდებით, ასეთი საქციელით ვერ შეგვაშინებენ! უკრაინაში ჩემნაირი მილიონობით ადამიანია. მესმის, რომ მათ ქუჩური ხულიგნური მეთოდებით მოქმედებას შეეჩვივნენ და სწორედ მათი დამსახურებით დროებით ხელისუფლებაშიც მოვიდნენ. მაგრამ, დარწმუნებული ვარ, უკრაინელი ხალხი ძალიან მალე ჩარეცხავს ამ არაშორსმჭვრეტელ მოღვაწეებს და მათ პოლიტიკურ სანაგვეში გადაისროლებს, ისევე როგორც მე ახლა ამ ბრილიანტის მწვანეს ვიშორებ. ჩვენი ბრძოლა იწყება. კარგად გაეცანით ჩემს წარსულსა და აღზრდას, ასევე იმას, თუ საიდან ვარ წარმოშობით“,-დაწერა საყვარელძემ.
აღნიშნულ ფაქტს, ასევე Facebook-ში, ოდესის ოლქის გუბერნატორი მიხეილ სააკაშვილი გამოეხმაურა.
მისი თქმით, „როგორც ჩანს „ტიტუშკებს“ Halloween უყვართ“.
„მაგრამ ღირს ბრძოლა იმისთვის, რომ Halloween წელიწადში 365 დღე არ გაგრძელდეს“,-აღნიშნა სააკაშვილმა.
მონიკა დავლიანიძე