დავით გარეჯის დაბრუნების მოთხოვნით, დღეს თბილისში საპროტესტო აქცია გაიმართება. „ფეისბუქში“ გავრცელებული ინფორმაციით, მსვლელობა 14:00 საათზე ვაკის პარკიდან დაიწყება, გადაინაცვლებს ყიფშიძის ქუჩაზე აზერბაიჯანის საელჩოსთან და გაგრძელდება ჭავჭავაძის გამზირზე. მსვლელობა პარლამენტთან დასრულდება.

„აქციის ძირითადი მოთხოვნაა საქართველოს ხელისუფლებამ და ხელისუფლების მიერ კონტროლირებადმა სატელევიზიო არხებმა საქართველოს მოქალაქეებს მიაწოდონ სრულფასოვანი ინფორმაცია დავით გარეჯის კომპლექსში შექმნილ ვითარებასთან დაკავშირებით; ასევე, საქართველოს მთავრობამ, პარლამენტმა და პრეზიდენტმა გადადგან ქმედითი ნაბიჯები დავით გარეჯის მონასტრის დეოკუპაციისთვის“, - ნათქვამია სოციალურ ქსელში გავრცელებულ განცხადებაში.