საზოგადოება

დეკანოზი გიორგი მამალაძე ჩაფიძის კლინიკაში გონების კარგვის დიაგნოზით არის შეყვანილი

ჩაფიძის კლინიკის სამედიცინო დირექტორის, ზაზა ბაზარაშვილის ინფორმაციით, დეკანოზ გიორგი მამალაძის სიცოცხლეს საფრთხე არ ემუქრება.

როგორც ბაზარაშვილმა ჟურნალისტებს განუცხადა, დეკანოზი კლინიკაში სინკოპეს - გონების კარგვის დიაგნოზით არის შეყვანილი.

მისივე თქმით, პაციენტი კონტაქტურია და მასთან მხოლოდ ადვოკატების შეშვება მოხერხდა.

„პაციენტი შემოყვანილია გონების კარგვის დიაგნოზით. მისივე გადმოცემით, ეს არ არის პირველი შემთხვევა. გიორგი მამალაძის სიცოცხლეს საფრთხე არ ემუქრება. უტარდება პროტოკოლით გაწერილი ღონისძიებები. მნახველების შეშვება არ ხდება, ვინაიდან სასჯელაღსრულების დაწესებულებიდან არის გადმოყვანილი. მასთან მხოლოდ ადვოკატები შევიდნენ. როდის მოხდება მისი კლინიკიდან გაწერა, ჯერჯერობით ამაზე ინფორმაციას ვერ მოგაწვდით, რადგან რიგი ღონისძიებებია გასატარებელი. ხვალ, 12:00 საათზე გაკეთდება განცხადება და მოგაწვდით მის ჯანმრთელობასთან დაკავშირებით არსებულ ინფორმაციას“, - განაცხადა ექიმმა.

თავის მხრივ, როგორც ადვოკატმა გიორგი ფანცულაიამ აღნიშნა, მამალაძის ჯანმრთელობის მდგომარეობიდან გამომდინარე, ციხის ადმინისტრაციამ მიიღო გადაწყვეტილება მისი კლინიკაში გადაყვანასთან დაკავშირებით. მისივე განცხადებით, დეკანოზ გიორგი მამალაძის მდგომარეობა ბოლო 4 დღის განმავლობაში არადამაკმაყოფილებელი იყო.

„ასეთი მდგომარეობიდან გამომდინარე, ციხის ადმინისტრაციამ მიიღო გადაწყვეტილება მისი კლინიკაში გადმოყვანასთან დაკავშირებით“, - განაცხადა ადვოკატმა.

ნინო ექვთიმიშვილი