საზოგადოება

დემურ სტურუას ოჯახი ექსპერტიზაზე დაყრდნობით აცხადებს, რომ გარდაცვლილს წამების კვალი ეტყობა

სამტრედიის რაიონის სოფლე დაფნარში გარდაცვლილი 22 წლის დემურ სტურუას ოჯახი ექსპერტიზის დასკვნაზე დაყრდნობით ამბობს, რომ თვითმკვლელობამდე ახალგაზრდას წამების კვალი აღენიშნებოდა. ექსპერტიზის პასუხი ოჯახს დასავლეთ საქართველოს საოლქო პროკურატურამ დღეს გააცნო.

დემურ სტურუას დედის თქმით, დასკვნაში წერია, რომ ახალგაზრდას წამების კვალი ენასა და ფეხის არეში აღენიშნება.

ოჯახს დაუდასტურეს დემურ სტურუას მიერ, სავარაუდო თვითმკვლელობამდე დაწერილი წერილის ავთენტურობაც. 22 წლის ახალგაზრდის ოჯახი სამტრედიაში, რაიონული პოლიციის შენობასთანაა შეკრებილი. ისინი სამტრედიის რაიონული სამმართველოს უბნის ინსპეტორ-გამომძიებლის გოდერძი თევზაძის დასჯას ითხოვენ.

,,სანამ თავს ჩამოიკიდებდა, მარჯვენა ფეხის წვივი აქვს დაზიანებული, ნაცემი და ენა .წერილის პასუხი ისაა, რომ მისი დაწერილია. ნაწამები რომაა, ეს თქვა ექსპერტიზამ. დადასტურდა რომ გოდერძი თევზაძის ნაწამებია, კამერასაც აქვს დაფიქსირებული მანქანაში რომ ჩაისვა და იანეთისკენ რომ მიყავდა“, - განაცხადა გარდაცვლილის დედამ ნონა ჯოჯუამ.

მთავარი პროკურატურის განცხადებით, გამოძიებით დადგინდა, რომ 2016 წლის 7 აგვისტოს გოდერძი თევზაძის მხრიდან დემურ სტურუაზე განხორციელებული მუქარის შედეგად, სტურუამ მიიღო თვითმკვლელობის გადაწყვეტილება.

მომხდარზე გამოძიება სამსახურებრივი უფლებამოსილების ძალადობით გადამეტებისა და თვითმკვლელობამდე მიყვანის ფაქტზე, სისხლის სამართლის კოდექსის 333-ე მუხლის მე-3 ნაწილის „ბ“ ქვეპუნქტითა და 115-ე მუხლით მიმდინარეობს.

მარი ნამგალაძე