ეკონომიკა

დევნილთა ნაწილს, შესაძლოა, სახელმწიფო შემწეობა მოეხსნას

მთავრობა ლტოლვილთა და განსახლების მიმართულებით რეფორმის გატარებას გეგმავს. რეფორმის ფარგლებში შესაძლოა მოხდეს დევნილთა ნაწილისთვის 45-ლარიანი სახელმწიფო დახმარების მოხსნა.

როგორც საკითხის კომენტირებისას მედიას ლტოლვილთა და განსახლების მინისტრმა სოზარ სუბარმა განუცხადა, მოხდება გარკვეული დიფერენცირება იმ პირების, რომლებსაც აღნიშნული დახმარება ნამდვილად ესაჭიროებათ.

„შესაძლოა გავაკეთოთ გარკვეული დიფერენცირება, რომ დევნილთა შემწეობები იყოს ორიენტირებული იმ დევნილებზე, რომლებსაც მართლა სჭირდებათ დახმარება, რომლებიც მართლაც სოციალურად გაჭირვებულები არიან და არა სიტყვაზე იმ ადამიანებზე, რომლებსაც აქვთ მაღალი თანამდებობები, კარგი ხელფასი“,-აღნიშნა სუბარმა.

საპარლამენტო უმრავლესობის წევრის მამუკა მდინარაძის თქმით, რეფორმის ფარგლებში არც ერთი დევნილის ინტერესი არ დაზიანდება.

„ამაზე ძალიან ნაადრევია საუბარი. ყველა შემთხვევაში ჩვენ ვფიქრობთ, რეფორმის ჩატარებას, რომლის ფარგლებში არც ერთი დევნილის ინტერესი არ დაზიანდება, პირიქით, ყველა გადაწყვეტილება და ყველა სიახლე წაადგება თითოეული მათგანის ინტერესებს“,-განაცხადა მამუკა მდინარაძემ.

აღნიშნულ საკითხს „ნაციონალური მოძრაობის“ წევრი ნუგზარ წიკლაურიც გამოეხმაურა და განაცხადა, რომ პარტიას ხელთ ჩაუვარდა სამინისტროდან დოკუმენტი, რომლის მიხედვით ირკვევა, რომ იგეგმება 1250-ლარიანი შემოსავლის ზღვარის დაწევა, ასევე, შეზღუდვა შეეხებათ იმ პირებს, რომლებიც არ არიან აფხაზეთსა და ცხინვალის რეგიონში დაბადებული, ასევე ქორწინებაში იმყოფებიან არადევნილ პირთან.

მონიკა დავლიანიძე