საზოგადოება

დღეს იუსტიციის სახლთან თეა წულუკიანის გადადგომის მოთხოვნით აქცია გაიმართება

დღეს, 19:00 საათზე თბილისში, იუსტიციის სახლთან იუსტიციის მინისტრის, თეა წულუკიანის დაუყოვნებლივ გადადგომის მოთხოვნით აქცია გაიმართება. მისი ორგანიზატორია მოქალაქეთა ჯგუფი „მე თავისუფლებისთვის“.

როგორც აქციის ფეისბუკგვერდზე წერია, ახალი მთავარი პროკურორობის კანდიდატები უნდა წარადგინოს ახალმა იუსტიციის მინისტრმა.

„დაუყოვნებლივ გადადგეს თეა წულუკიანი და ახალი, საზოგადოების ნდობით აღჭურვილი პროკურორობის კანდიდატები წარადგინოს ახალმა იუსტიციის მინისტრმა, ფართო საზოგადოებრივი ჩართულობისა და კონსესუსის შედეგად!“, - წერია აქციის ფეისბუკგვერდზე.

მოქალაქეების შეფასებით, თეა წულუკიანი ვერ აირჩევს დამოუკიდებელ პროკურორს შემდეგი მიზეზების გამო:

იუსტიციის მინისტრი არის პერსონალურად პასუხისმგებელი სასამართლო სისტემის რეფორმაზე, რომელიც არ განხორციელდა;

იუსტიციის მინისტრმა არ იზრუნა დამოუკიდებელი საგამოძიებო ორგანოს ჩამოყალიბებაზე, რომელიც გამოიძიებდა სამართალდამცველთა მიერ ჩადენილ დანაშაულებს;

იუსტიციის მინისტრმა მთავარ პროკურორ შოთაძეს მადლობა გადაუხადა კარგად შესრულებული საქმიანობისთვის მისი გადადგომის შემდეგ;

იუსტიციის მინისტრის მიერ შერჩეულმა ოთხიდან ვერცერთმა მთავარმა პროკურორმა ვერ იმუშავა დამოუკიდებლად;

თეა წულუკიანი არ აღიარებს და პატივს არ სცემს სასამართლო ხელისუფლებას! ის არ აღასრულებს სასამართლოს გადაწყვეტილებებს გახმაურებულ საქმეებზე, იყენებს ინსტიტუციურ მექანიზმებს პირადი მიზნებისთვის, უკანონოდ ათავისუფლებს თანამშრომლებს სამსახურიდან;

იუსტიციის მინისტრმა არამიზნობრივად გაზარდა საშტატო ერთეულთა რაოდენობა იუსტიციის სისტემაში და პარტიული აქტივისტებით გაავსო სამინისტრო;

თეა წულუკიანს არ აქვს იურისტის დიპლომი;

სტრასბურგმა ორჯერ დაუწუნა მოსამართლეთა სია;

წაგებული აქვს თითქმის ყველა საქმე საერთაშორისო დონეზე;

იუსტიციის მინისტრს უნდობლობა გამოუცხადა არასამთავრობო სექტორმა.

აქციის ორგანიზატორთა შეფასებით, პროკურატურისადმი ნდობის აღსადგენად აუცილებელია, რომ მთავარი პროკურორის თანამდებობაზე შეარჩიონ პირი, „რომელიც არ არის აფილირებული მმართველ პარტიასთან და სარგებლობს მაღალი საზოგადოებრივი ნდობით“.