საზოგადოება
დღეს პანკისის ხეობაში სოფელ დუისში ჩატარებულ სპეცოპერაციასთან დაკავშირებით საპროტესტო აქცია გაიმართება
დღეს პანკისის ხეობაში საპროტესტო აქცია გაიმართება. ადგილობრივების მთავარი მოთხოვნა იქნება სოფელ დუისში ჩატარებული სპეცოპერაციის მონაწილე პირებისა და მათი ხელმძღვანელების დასჯა.
იმავეს მოითხოვს 26 დეკემბრის სპეცოპერაციის შედეგად დაღუპული თემირლან მაჩალიკაშვილის მამა, მალხაზ მაჩალიკაშვილი.
„წარდგნენ სასამართლოს წინაშე გომეალურის მთლიანი ჯგუფი და ის სპეცრაზმელები, ვინც ჩემთან სახლში შემოიჭრნენ. ეს მოთხოვნები აქვს ხეობის ხალხს, რამდენადაც მე ვიცი. მე თვითონაც ამას მოვითხოვ.
არ მჭირდება მთავრობისგან იმის მოსმენა, რომ ფაქტები უნდა გამოიძიონ, ფაქტი ისაა, რომ ეს იყო უმწეო, უდანაშაულო ბავშვი, რომელიც მომიკლეს და ჩემი დარჩენილი ცხოვრება ჯოჯოხეთად გადამიქციეს.
ბოლოს და ბოლოს, თუ სადმე კანონი არსებობს ამ დუნიაზე, ამას მე დავამტკიცებ და ყველა აგებს პასუხს“, - აცხადებს მალხაზ მაჩალიკაშვილი.
გარდა ამისა, დღეს უნდა გავრცელდეს უხუცესთა განცხადება, თუმცა ჯერჯერობით უცნობია, რა შინაარსის იქნება ეს წერილი.
აქცია მას შემდეგ დაიგეგმა, რაც ტერორიზმის საქმეზე დაკავებულმა რუსლან ალდამოვმა დუმილი დაარღვია. როგორც მან თავის ადვოკატ, მარიამ კუბლაშვილს გაუმხილა, სპეცრაზმელები სინამდვილეში მის ლიკვიდაციას ცდილობდნენ, მაგრამ ის შეეშალათ თემირლან მაჩალიკაშვილში.