პოლიტიკა

დღეს პრეზიდენტს საპარლამენტო უმრავლესობის 7-კაციანი შემადგენლობა შეხვდება

ცნობილია საპარლამენტო უმრავლესობის 7 დეპუტატის ვინაობა, ვინც დღეს პრეზიდენტს შეხვდება. მმართველი გუნდის შემადგენლობაში შედიან უმრავლესობის ლიდერი არჩილ თალაკვაძე, ასევე ფრაქცია „ქართულ ოცნებაში“ შემავალი პარტიებისა და პოლიტიკური ჯგუფების ხელმძღვანელები - მამუკა მდინარაძე, გია ჟორჟოლიანი, ნინო გოგუაძე, სიმონ ნოზაძე, კახა ოქრიაშვილი და გიორგი გაჩეჩილაძე.

ახლად მიღებულ კონსტიტუციაზე სასაუბროდ პრეზიდენტი მმართველ გუნდს დღეს 16 საათზე პრეზიდენტის სასახლეში შეხვდება.

შეგახსენებთ, კონსტიტუციის მიღების შემდეგ პარლამენტის თავმჯდომარემ, ირაკლი კობახიძემ შესთავაზა პრეზიდენტ გიორგი მარგველაშვილს, ვეტო დაადოს ორ საკონსტიტუციო ცვლილებას. ერთ-ერთი მათგანი ეხება ბონუსის მექანიზმის გაუქმებას, ხოლო მეორე 2020 წლის საპარლამენტო არჩევნებისთვის ერთჯერადად ბლოკების შესაძლებლობის დატოვებას. მან აღნიშნა, რომ ამ საკითხზე სალაპარაკოდ მზადაა, ქვეყნის პირველ პირს შეხვდეს.

ახალი კონსტიტუცია საქართველოს პარლამენტმა 26 სექტემბერს მიიღო.

ანა მებურიშვილი