პოლიტიკა
დღეს შეიქმნა საქართველოსთვის ხელსაყრელი საერთაშორისო პოლიტიკური კონიუნქტურა ჩვენი საკითხების წინა პლანზე წამოსაწევად - გიორგი კანდელაკი
„ევროპული საქართველოს“ წევრმა გიორგი კანდელაკმა დადებითად შეაფასა გიორგი მარგველაშვილის მიმართვა აშშ-ის კონგრესისადმი, რომლის მიხედვით, ამერიკულმა მხარემ საქართველოს მხარდამჭერი აქტი უნდა მიიღოს.
დეპუტატის თქმით, მსოფლიოში შექმნილი სიტუაცია თბილისს ხელს უწყობს, წინა პლანზე წამოწიოს საქართველოს საკითხი და ამით უნდა ისარგებლოს მთავრობამ.
„ეს ნამდვილად სწორი იდეაა, დღეს შეიქმნა საქართველოსთვის ხელსაყრელი საერთაშორისო პოლიტიკური კონიუნქტურა ჩვენი საკითხებისა და პრობლემების წინა პლანზე წამოსაწევად, მაგრამ, რა თქმა უნდა, აღმასრულებელი ხელისუფლებისა და უპირველეს ყოვლისა, პრემიერ-მინისტრის აქტიურობის გარეშე აქედან არაფერი არ გამოვა და უპირველეს ყოვლისა, რა თქმა უნდა, ვგულისხმობ, ოთხოზორია-ტატუნაშვილის სიის მიღების მწვავე აუცილებლობას. სამი კვირა გავიდა და პარლამენტს ჯერაც ვერ მიუღია სანქციების პაკეტი. სანქციების პაკეტის არმიღების შემთხვევაში, თეორიული შანსიც, რომ ამ საერთაშორისო კონტექსტში საქართველოს საკითხი მოხვდეს, არ იარსებებს“, - განაცხადა კანდელაკმა.