საზოგადოება

დღის ბოლოსთვის გვექნება გაცილებით უკეთესი სურათი - ზურაბ პატარაძე

მეოთხე დღეა, ხულოში, შავნაბადას მთაზე ხანძრის სალიკვიდაციო სამუშაოები მიმდინარეობს. აჭარის მთავრობის თავმდჯომარისა და საგანგებო შტაბის ხელმძღვანელის, ზურაბ პატარაძის ინფორმაციით, ადგილზე 2 ვერტმფრენი მუშაობს - ერთი ქართული და ერთი თურქული. ბოლო მონაცემებით, ადგილზე 850 ადამიანია ჩართული ცეცხლის ჩაქრობაში, მობილიზებულია ტექნიკა.

აჭარის მთავრობის მეთაურის თქმით, მთელი ღამის განმავლობაში მიმდინარეობდა გზის გაყვანითი სამუშაოები. ამის შესახებ მან აჭარის ტელევიზიის ეთერში განაცხადა.

„მინდა გითხრათ, რომ დღეს პოზიტიური დღე გვაქვს. ყველა მიმართულებით მიმდინარეობს აქტიური სამუშაოები, ჩაერთო ორი ვერტმფრენიც, მათ შორის თურქული ვერტმფრენიც და ისინი საკმაოდ ეფექტურად მუშაოებნ. ამავდროულად მინდა აღვნიშნო, რომ საგანგებო დავალებათა დეპარტამენტის წარმომადგენლები დამატებით ჩამოვიდნენ ჩვენთან რეგიონში. ჯამში შსს-ის ქვედანაყოფის 350 წარმომადგენელია ამ ლოკაციაში, ასევე დღეს დილით ჩამოვიდა 100-მდე მეხანძრე და სამაშველო სამსახურის წარმომადგენელი. სამუშაოებში ერთობლივად 850 ადამიანი ღებულობს მონაწილეობას. მობილიზებულია ტექნიკაც. მთელი ღამის განმავლობაში მიმდინარეობდა გზის გაყვანა, არსებული ავზების დაღრმავება და გაფართოება, ვინაიდან 2 ვერტმფრენი მუშაობს რეგიონში. შემოტანილია პორტატიული ტექნიკა, ხანძარსაწინააღმდეგო დანადგარებიც. ვფიქრობ, დღეს ძალიან ეფექტური დღე გვაქვს და დღის ბოლოსთვის გვექნება გაცილებით უკეთესი სურათი. ამინდიც ხელს გვიწყობს“, - თქვა პატარაძემ.

პატარაძის ინფორმაციით, ჯერჯერობით ცეცლხის კერებამდე სახანძრო მანქანების მიყვანა ვერ ხერხდება, თუმცა სიტუაცია რამდენიმე საათში გამოსწორდება.

„ჯერჯერობით რთული რელიეფის გამო უშუალოდ მანქანების მისვლა ამ ეტაპზე შეუძლებელია , მაგრამ რამდენიმე საათში ეს გზა იქნება საბოლოოდ მიყვანილი და დასრულებული და უშუალოდ მანქანები მივლენ ცეცხლთან“, - თქვა საგანგებო შტაბის უფროსმა.

აჭარის მთავრობის ხელმძღვანელის თქმით, ცეცხლის კერების ფართობი ორჯერაა შემცირებული. ყველაზე მძიმე სიტუაცია მეოთხე კერასთან ფიქსირდება. იმის გამო, რომ ეს მიუდგომელი ადგილია, ცოცხალი ძალის გამოყენება იქ ვერ ხერხდება, ამიტომ იმ ლოკაციაზე ვერტმფრენები მუშაობენ.

ცეცხლის ჩაქრობის ოპერაცია დილის 6 საათიდან განახლდა. გუშინ გაიჭრა სამ კილომეტრამდე გზა.

ანა მებურიშვილი