საზოგადოება

დღის განმავლობაში დიდი მანქანების ქალაქში გადაადგილება შესაძლოა, შეიზღუდოს

თბილისის მერმა კახი კალაძემ დედაქალაქის ქუჩებში საცობების თემასთან დაკავშირებით განცხადება გააკეთა.

მან შს მინისტრთან შეხვედრის დეტალებზე ისაუბრა და აღნიშნა, რომ მხოლოდ მერიის ჩართულობა ამ საკითხში საკმარისი არ არის.

,,შსს-ს გარეშე ამ პრობლემას ვერ მოვაგვარებთ და ფონს ვერ გავალთ. მერიამ „თბილსერვისს“ უკვე დაავალა, უახლოეს ხანში წარმოადგინოს ნარჩენების გატანის გეგმა. აუცილებელია განსაკუთრებით ღამის საათებში მოხდეს ეს, რადგან არ შეიზღუდოს მოძრაობა დღის განმავლობაში“, – განაცხადა კალაძემ.

მისივე თქმით, საუბარია, ასევე სადისტრიბუციო კომპანიებთან მოლაპარაკებებზე, რათა დღის განმავლობაში არ მოხდეს დიდი მანქანების შემოსვლა ქალაქში.

,,პრობლემას ქმნიან სატვირთო მანქანები და ყვითელი მიკროავტობუსები, რომლებიც ყველგან აჩერებენ. გამოყოფილი იქნება კონკრეტული ქუჩები, სადაც ექნებათ გაჩერების უფლება“, – განაცხადა კალაძემ.