პოლიტიკა

“ეს არის ის კომისია, რომელსაც ხელმძღვანელობს „ქართული ოცნების“ ღვარძლიანი და ბოღმიანი სახე, ქალბატონი წულუკიანი”- „ევროპული საქართველო“ უწყებათაშორისი კომისიის მუშაობაში ჩართვაზე უარს აცხადებს

„ევროპული საქართველოს" საარჩევნო შტაბის ხელმძღვანელის, სერგი კაპანაძის განცხადებით, ისინი უწყებათაშორისი კომისიის შეხვედრებში მონაწილეობას აღარ მიიღებენ.

„ევროპული საქართველო“ მონაწილეობას არ მიიღებს უწყებათაშორისი კომისიის შეხვედრებში. ეს არის ის კომისია, რომელსაც ხელმძღვანელობს „ქართული ოცნების“ ერთ-ერთი გამორჩეული, ღვარძლიანი და ბოღმიანი სახე, ქალბატონი წულუკიანი, რომელიც ამ კომისიასაც და სხვა დანარჩენსაც იყენებს თავისი პოლიტიკური მიზნებისთვის. ჩვენ კარგად ვიცით მისი დამოკიდებულება ოპოზიციის მიმართ, ის ვერასდროს ვერ მალავს თავის ზიზღს განსხვავებული მოსაზრების მქონე ადამიანების მიმართ. ჩვენ კარგად ვიცით, როგორ იყენებს თავის პოზიციას ბოროტად საკუთარ უწყებაში, მის დაქვემდებარებულ საჯარო მოხელეებთან მიმართებაში; კარგად ვიცით, რამდენჯერ გაათავისუფლა მან სამსახურიდან პოლიტიკური მოსაზრების გამო თავისი თანამშრომლები, როგორ დევნის განსხვავებულ მოსაზრებას და სამწუხაროა, რომ ასეთი ადამიანი ხელმძღვანელობს უწყებათაშორის კომისიას, რომლის ამოცანაა, რეაგირება მოახდინოს საარჩევნო საკითხებზე. ქალბატონი წულუკიანი არც ერთხელ არ ყოფილა დაინტერესებული, რაიმე პრობლემა, რომელიც იქ იქნებოდა წარმოდგენილი, მოგვარებულიყო. ამიტომ, ამ ღვარძლიანი ადამიანის შოუში მონაწილეობას არ ვაპირებთ, შეუძლია შეიკრიბოს თავის თანამზრახველებთან ერთად და რაზეც უნდა იმაზე იმსჯელონ. ყველა დარღვევაზე ჩვენ გვექნება რეაგირება, მათ შორის მოვახდენთ საერთაშორისო თანამეგობრობის ინფორმირებას“, – განაცხადა კაპანაძემ.