პოლიტიკა
ამ რთულ გეოპოლიტიკურ დროში ვხედავთ, რომ საქართველოს შეუძლია, დაეყრდნოს თავის პარტნიორებს - სალომე ზურაბიშვილი
საქართველოს პრეზიდენტი სალომე ზურაბიშვილი ნატო-რუსეთის საბჭოს სხდომის დასრულების შემდეგ ნატო-ს გენერალური მდივნის, იენს სტოლტენბერგის მიერ გაკეთებულ განცხადებას სოციალურ ქსელში ეხმაურება.
"დღეს მნიშვნელოვანი განცხადება გააკეთა იენს სტოლტენბერგისგან. ამ რთულ გეოპოლიტიკურ დროში ვხედავთ, რომ საქართველოს შეუძლია დაეყრდნოს თავის პარტნიორებს, რომ ისინი განაგრძობენ ჩვენი სუვერენიტეტისა და ტერიტორიული მთლიანობის მხარდაჭერას", - დაწერა პრეზიდენტმა Twitter-ზე.
შეგახსენებთ, ნატო-რუსეთის საბჭოს სხდომა დღეს გაიმართა. სხდომის დასრულების შემდეგ ჩრდილოატლანტიკური ალიანსის გენერალურმა მდივანმა, იენს სტოლტენბერგმა განაცხადა, რომ „ნატო-რუსეთის საბჭოზე მოკავშირეებმა კიდევ ერთხელ დაადასტურეს ალიანსის ღია კარის პოლიტიკა და თითოეული ქვეყნის უფლება, აირჩიოს უსაფრთხოების საკუთარი გზა“.
ამასთან, სტოლტენბერგის თქმით, „ნატო-ს მოკავშირეებმა რუსეთს მოუწოდეს, პატივი სცეს საქართველოს, უკრაინის, მოლდოვის ტერიტორიულ მთლიანობას, ჩვენ არ წავალთ კომპრომისზე რომელიმე ქვეყნის სუვერენიტეტის მიმართ“.