კომენტარი

დიდი იმედი მაქვს, ჩამოვა და მოიხდის სასჯელს - გუდაურში დაღუპული სალომე ტატიშვილის დედა სააპელაციო სასამართლოს გადაწყვეტილებაზე

გუდაურში სრიალისას მომხდარი შეჯახების შედეგად დაღუპული 12 წლის სალომე ტატიშვილის დედის, ნინო ჟვანიას განცხადებით, მოზარდის სიცოცხლის მოსპობაში ბრალდებული გიორგი ლიპარტელიანისთვის 3-წლიანი პატიმრობის შეფარდებით სამართალი აღსრულდა.

ჟვანიამ აღნიშნა, რომ პრეცედენტი შეიქმნა, რომელიც მნიშვნელოვანია სამთო-სათხილამურო კურორტებზე ადამიანთა უსაფრთხოების დაცვისთვის.

„გარდა იმისა, რომ სამართალი აღსრულდა, ეს არის გარდამტეხი, ჩვენს სამთო-სათხილამურო კურორტებზე ადამიანებისა და განსაკუთრების ბავშვების სიცოცხლის დაცვის თვალსაზრისით, მათი უსაფრთხოების, ჯანმრთელობის დაცვისა და გაფრთხილების თვალსაზრისით. ერთხელ და სამუდამოდ უნდა დასრულდეს ნასვამი ადამიანების უპასუხისმგებლო საქციელი სათხილამურო ტრასებზე, რომელსაც ეწირება უდანაშაულო ხალხი“, - განაცხადა სალომე ტატიშვილის დედამ.

ჟვანიამ იმედი გამოთქვა, რომ ბრალდებული საქართველოში დაბრუნდება და სასჯელს მოიხდის.

„ბრალდებულმა უნდა მოიხადოს სასჯელი აუცილებლად და ძალიან დიდი იმედი მაქვს, მისი ოჯახის წევრები დათვურ სამსახურს არ გაუწევენ ამ ადამიანს და კიდევ უფრო არ დაუმძიმებენ ბრალს. დიდი იმედი მაქვს, ჩამოვა და მოიხდის სასჯელს“,-თქვა ჟვანიამ.

თბილისის სააპელაციო სასამართლოს მოსამართლეთა კოლეგიამ გუდაურში სრიალისას 12 წლის სალომე ტატიშვილის მკვლელობაში ბრალდებული 20 წლის გიორგი ლიპარტელიანი გაამტყუნა და 3 წლით თავისუფლების აღკვეთა შეუფარდა.

ლიპარტელიანი სალომე ტატიშვილს გუდაურში 2016 წლის 10 იანვარს შეეჯახა. მოზარდი თავის ორ დასთან და სპორტული სკოლის სხვა მოსწავლეებთან ერთად გუდაურის ერთ-ერთ ყველაზე რთულ ტრასაზე, კუდები სამზე სრიალებდა, რა დროსაც მას დიდი სისწრაფით შეეჯახა ლიპარტელიანი. არასრულწლოვანი ადგილზევე დაიღუპა. ტატიშვილის დედის, ნინო ჟვანიას თქმით, ლიპარტელიანი ნასვამი იყო.

ბრალდება და სალომე ტატიშვილის ოჯახი გიორგი ლიპარტელიანს სიცოცხლის გაუფრთხილებლობით მოსპობას ედავება, თუმცა 2017 წლის 29 დეკემბერს საქალაქო სასამართლოს მოსამართლემ ბესიკ ბუგიანიშვილმა ლიპარტელიანი უდანაშაულოდ ცნო. ოჯახმა აღნიშნული გადაწყვეტილება სააპელაციო სასამართლოში გაასაჩივრა.

თვითონ ბრალდებული სასამართლო სხდომას არ ესწრებოდა. ის პრაღაში ცხოვრობს და სწავლობს.